Aizawl: MPCC President thar, Lal Thanzara chuan Congress party hruaitu inthlanna neih zawh taka tling zo ta lote pawh an hruaitute an la ni reng dawn tih a sawi.
Zirtawpni khan MPCC chuan Congress Bhavan-ah ‘Friday Political Session’ hmangin, he hunah hian MPCC OB thlan thar te charge inhlanna hun hman a nih bakah, executive member thlan thar te certificate hlanna hun hman a ni bawk.
He hunah thusawiin MPCC President Lal Thanzara chuan MPCC OB inthlanna neih zawh taka, an campaign laia tawngkam duh thawh deuh, mi dang tana hriat nuam lo an tih a awm chuan theihnghilhsak turin party mite a ngen.
Lal Thanzara chuan, “Congress party kan kal zelnaah min finchhuah a, thurawn min pe a, min tawngtaipui reng turin ka ngen che u a. Hma lam pana kan dinchhuah leh theih nan kan chunga mawhphurhna min pek hi tihhlawhtlinpui ngei turin hma kan la dawn a ni,” a ti a. An OB tling lote pawh an hruaitute an la ni reng dawn avangin an tanpuina a ngenin, khawhara an awm loh tur thu a tiam bawk.
MPCC president chuan executive member inthlannaa tling lote pawh, an zavaiin party-a an hmalaknaah thawhpui zel turin a ngen a. An senior, CWC member, Lal Thanhawla leh C Chawngkunga ten an la uap zel chu a thlamuanthlak a tih thu a sawi a. India ramah nekchepna leh tihduhna a nasa zelah, ram leh hnam, sakhua chawikana humhim a nih theih nan Mizo mipui chu MP inthlan lo awm turah Mizoram leh India-ah INC-in hlawhtlinna a chan ngei theih nan thawhhopuiah a sawm.
He hunah hian MPCC Vice President thlan thar Lalnunmawia Chuaungo leh Treasurer thlan thar Dr Lalmalsawma Nghaka te pawhin thu an sawi bawk.
Inkhawmah hian OB thar te hi Mahila, MPYCC leh NSUI ten lawmpuina pangpar leh thuziak an hlan a ni.