Aizawl: MNF Adviser R Lalzirliana’n thalaite mila kal thiam apiang an dingchang tawh tih a sawi.
Nimina Mizo Hnam Run chhung inkhawmah thusawiin R Lalzirliana chuan, tun inthlanah zawlnei leh thlarau mi intite thupuan a dik loh nasat thu a sawi a. Pathian chu tawngkam mai ni lo, thinlung zawng zawnga tih mi a nih thu a sawi.
MNF insiam that leh thuai theihna tur chuan thawktu zawng zawngte an chak lohna lai inenfiah a ngaih thu sawiin MNF Adviser chuan, “Kawng engkimah Pathian rawn chung zela kal a pawimawh a. ‘Pathian leh kan ram tan’ titu party chuan thinlung leh tih tak zeta Pathian lam kan hawi reng a tul a ni,” a ti.
Tun dinhmunah chuan politics a ni emaw, kohhran huang chhungah a ni emaw, thalaite mize mila kal thiam a piang an dingchang tawh tih sawiin, “Kan rilru leh ngaihtuahna zawng zawngte chu thalaite rilru mila kan inherrem thiam a pawimawh tawh a ni,” tia sawiin MNF Adviser chuan, tun inthlana ZPM tlin chhan chu an that leh tam bik hrim hrim vang pawh ni lovin, ruling chet chhiatna lai an hmuh leh hriatte an kher peihin, an vawrh nasa chu mi rilruah nasa takin hna a thawk tih a sawi bawk.