Pathianni zing khan Professional Fight League (PFL) ah fight ngaihven hlawh tak a awm a, champion lai pahnih Renan Ferreira leh Ryan Bader te an inhmachhawn. Fight ngaihven hlawh tak hi beisei phak lo takin a tawp a, Ferreira-a’n awlsam zetin hnehna a chang. Ferreira hian UFC champion hlui Francis Ngannou a hmachhawn zui tura ngaih a ni.
PFL palian champion Ferreira hian Bellator champion Ryan Bader lakah tha chungchuang taka bul tanin, a khingpui hi second 21 chhung lekin a knockout hman der. Bellator champion Ryan Bader hian ngam takin Ferreira a nawr nghal a, a tisual. Na taka hnek a tum laiin Ferreira hian counter punch tha zetin a lo hnek fuh siah a, a khingpui a hnek tlu nghal der. A khingpui tlu hi rang zetin a bawh zui a, chiang zeta a hnek fuh zawn hnuin referee in fight a titawp a, Renan Ferreira-a’n awlsam takin hnehna a chang. He fight ngaihven hlawh tak hi kawnghren inchuhna a ni lo thung.
UFC heavyweight champion Francis Ngannou chuan UFC a chhuahsan hnuin Professional Fight League hi a zawm zui ve nghal. PFL-ah a hming ziak lut mah se boxing-ah palian champion Tyson Fury a hmachhawn a. Fury bakah Anthony Joshua a hmachhawn leh dawn vangin PFL-ah a la inlan lo. Pathianni zinga intum Renan Ferreira leh Ryan Bader te inbeia chak zawk zawk hi Ngannou khingpui tur atan ruat lawk a ni a. Bader lakah awlsam taka chak Ferreira chu PFL-ah Ngannou khingpui hmasa ber tur a ni dawn ta a ni.
Awlsam taka Bader a hneh hnuin Ferreira a hneh hnuin, “Kei hi buaina dik tak chu ka ni. Record siamtu kan ni a, record thlak danglamtu ka ni bawk. Nau Ngannou chu khawiah nge i bihruk, heta hi kei chu ka awm e. Ka lo nghak reng che a nia”, tiin a khingpui ni zui leh tur Francis Ngannou chona thu a chhakchhuak zui nghal.