Inrinni zinga NBA regular season khelhah zirtawp zinga tlawm Los Angeles Lakers chuan an khingpui San Antonio Spurs an hneh. Inkhel dangah champion lai Denver Nuggets in hnehna an chang bawk.
LA Lakers hian an khingpui San Antonio Spurs chu inkhel hmuhnawm takah point ngain an hneh thei hram. Point 123-118 ion Spurs lakah an chak tum hian LA Lakers player pawinawh LeBron James chu dam tha takin a inlan ve leh thei ta a. NBA player ropui James hian point 30 a thawkchhuak a, Lakers tan a vul.
Inrinni zinga inkhel dangah champion lai Denver Nuggets chuan Portland Trail Blazers an hmachhawn a, point 127-112 in an hneh. Nuggets hian Western Conference-ah palina an luah mek. Nuggets tan hian Nikola Jokic chuan point 29 a thawkchhuak a, ball sawhlet vawi 15 a dawn bakah assist vawi 14 a nei a, season kal mekah a vawi 17 nan triple-double a puitlin.
Eastern Conference ah pathumnaa awm mek Milwaukee Bucks chuan an khingpui Minnesota Timberwolves chu point 112-107 in an hneh. He inkhelah hian Bucks tan Giannis Antetokounmpo chuan point 33 a thawkchhuak a, ball sawhlet vawi 13 a dawng bawk.
Inrinni zing hian season kal meka khel tha lo Golden State Warriors chuan an khingpui Charlotte Hornets chu point 97-84 in an hneh a. Hetihlai hian Kevin Durant point 28 thawhchhuahin Phoenix Suns tlawm tur a chhanhim zo chuang lova. Suns hi Houston Rockets lakah point 110-114 in an tlawm.