US, UK leh EU chuan Russia-in Ukraine a rûn atanga kum hnih a tlin leh mek laiin hrekna a tihbelh leh.
Lung ina a tan laia eptu hruaitu, Alexei Navalny a thih atanga chawlhkar hnihnaah hrekna hi tihbelh a ni bawk.
Hrekna an tih hi ram pakhatin ram dang laka a kalpui a nei a, na taka a kal leh khawvel dan a bawhchhiat avanga hrekna hi kalpui thin a ni.
Na taka hrekna kalpui leh indona avanga inhrekna hi a tam ber thin.
US President Joe Biden chuan Russia a hrekna hi chi hrang hrang 500 a puan belh leh a, indona hmanrua lama hrekna a tam ber a. Firm leh mi mal 100 dawn lakah ram danga thil thawn chhuah khapna a kalpui bawk.
President Biden-a hian Arctic penal camp-a a tannaa thi ta, Navalny-a mannaa inhnamhnawihte pawh tihtel a ni tih a sawi bawk.
UK hian a tanna lung ina hotu parukte thil neih khawih chet theih loh turin a ti a, UK-a an zin khapsak an ni bawk.
UK-in hrekna a siam belh zingah Russian thir, lunghlu leh energy thawn chhuah lamah khuahkhirhna a tel.
EU pawhin Russia-in ralthuam a neih theih nana puitu pawl leh mi mal 200 vel hrekna a tihbelh bawk a, heng zingah hian Ukrainian naupangte la chhuaktute pawh an tel bawk.
Heng hrek zingah hian Russia hnena North Korean ralthuam thawntu mi mal leh company-te an tel bawk a ni.
Russia hian February, 2022 atang khan Ukraine rûnin US, UK leh EU bakah Australia, Canada leh Japan ten chi 16,500 chuangin an hrek phah.
An tum ber chu Russia pawisa a ni.
Ram dang pawhsa a dah that $ tluklehdingawn 350 hu, an dah that zahve chuang chu khawih chet theih loh turin an ti.
Russian bank-te thil neih 70% chuang chu khawih chet theih lohvin an ti a, EU chuan thenkhat chu sumdawngten pawisa an inpek kualna, Swift atanga dah chhuah an ni tih a sawi bawk.
Khawthlang ramte hian Russia-in ralthuam siam nana a hman theih technology-te thawn chhuah a khap a, Russia atanga rangkachak leh lunghlu lak luh te, Russia atanga zin luh te, Kremlin nena inkungkaihna nei mi hausa leh an nawmchenna lawng tihchet theih loh tur pawhin a hrek bawk.
Khawthlang ramte hian Russia-a oil industry pawh a bitum hle a. US leh UK chuan Russian tuialhthei leh natural gas lak luh a titawp a. EU pawhin tuipui atanga thlitfim loh tuialhthei a lak luh a titawp hmak bawk.
Khawvel ram lian pasarih, G7 chuan Russian tuialhthei thlitfim loh hi a man to berah barrel khat $60 turin a bithliah a, hei hi tuialhthei atanga an sum lak luh a tlem theih nana a tih a ni.
Khawvel huap firm lian tam tak, McDonald’s, Coca-Cola, Starbucks leh Heineken pawh telin, Russia-a an bungraw hralh leh siam a titawp.
Hetih lai hian thenkhat chuan an la kalpui reng a. PepsiCo pawhin an ei tur an la hralh reng a. US cosmetics firm Avon pawhin Moscow bul lawkah factory an la nei.
President Vladimir Putin chuan khawthlang ramten an hrekna hian Russia a tibuai pha lo tih a sawi a, “Kan thang zel a, anni hi an tawlhhnung zawk,” a ti.
Russia hian a tuialhtheite chu G7-in a man bi a thliahsak aia tovin ram dangah a hralh tho niin US think tank Atlantic Council chuan a sawi a. ‘A rukin tanker 1,000 chuangin an thawn chhuak reng’ niin a sawi.
International Energy Agency pawhin Russia hian ni tin barrel maktaduai 8.3 a la thawn chhuak ziah a, India leh China-a a hralh a tam zual niin a sawi ve bawk.
Russia hian khawthlang ram bungrua pawh ram dang a thawhpui thenkhat – Georgia, Belarus leh Kazakhstan kaltlangin a la lei reng bawk niin King’s College London-a zirbingtuten an sawi.
China chu khawthlang ramin hi-tech bungrua a siam ang chi thawn lut tam ber a ni bawk niin US think tank, Center for Strategic & International Studies-a an hotu, Dr Maria Snegovaya chuan a sawi.
“China hian chip leh thil dang, sipai hmanrua atana hman ang chi chu a pe reng a ni,” a ti a. “China puihna tel lo chuan hemi kawngah hian Russia hian rei a daih thei lo,” a ti.
Ukraine a rûn tan kum, kum 2022 khan Russia economy hi 2.1% chauhvin a thang niin International Monetary Fund chuan a sawi.
Kum 2023-ah khan 2.2%-a thang tura beisei a ni a, 2024-ah phei chuan 1.1% chauhva thang tura rinlawk a ni.
US Treasury erawh chuan Russia economy thanna chu kum hnih liam ta chhungin 5% zetin a hniam niin a sawi ve thung.
Dr Snegovaya-i erawh chuan, “Hreknate hian Russia hi na takin a khawih pawi pha lem lo va, indona hi eng emaw chen chu a la kalpui thei dawn tihna a ni,” a ti.
US Treasury hian Ukraine-a indona leh hrekna kalpui hi mi maktaduai tel, a bik takin thalai leh zirna sang zirten an tuar a, tam takin Russia an chhuahsan phah niin a sawi.
Russia-a sorkar hian Ukraine indona avang hian damdawi ina hman tur pawisa tak tak a titlem niin UK Ministry of Defence chuan a sawi.
“Hei hi thingtlang miten an tuar hle,” tiin foreign affairs think tank Chatham House-a mi, James Nixey chuan a sawi a. “Sorkar hian khawpui lian ni lovin thingtlangah a kalpui nasa a, an tuar nasa hle a ni,” a ti.