Samajwadi Party chief Akhilesh Yadav chuan Pathianni khan Rahul Gandhi-a’n Bharat Jodo Nyay Yatra a kalpui mek chu Uttar Pradesh-a Agra a kaltlang laiin a lo zawm ve.
Tun hnai lawkah Lok Sabha inthlanpui lo awm turah Yadav-a kaihhruai SP leh Congress hian Uttar Pradesh-a dinna bial inchan sem dan tur an tifel a. An indawrnaa hmalatu tangkai tak, Priyanka Gandhi Vadra-i pawh Pathiannia kawng zawhnaah hian a tel ve bawk.
Party pahnih thawhhona tur hian eptu tangrual, INDIA-ah phurna a thlen ngei rin a ni a. Yadav-a hi Gandhi-a’n chhimtawp atanga hmartawp thleng kawng a zawh hnua khawchhak atanga khawthlang kawng a zawh leh meka eptu party hruaitu langsar zinga zawmtu hmasa a ni.
Trinamool Congress chief leh Bengal Chief Minister Mamata Banerjee chuan Gandhi-a’n an state a kaltlang laiin a lo tawiawm lo tawh a, tun thlengin bial inchan sem dan turah an la inching fel thei lo zui.
Congress hian Bengal-ah hian Trinamool nena thawhho dan tur an la dap zel a, Assam leh Meghalaya-a dinna tur bial ken thlengin an tiam a; mahse, an la inching fel thei lo zel.
Kar liam ta tir lamah khan Akhilesh Yadav leh Priyanka Gandhi Vadra inbiain SP-in Uttar Pradesh-a bial 17-a dintir an tumna chu an pawm.
Congress hian Madhya Pradesh-a bial khat chu SP dinna turin an pe ve dawn bawk.
Uttar Pradesh-ah hian an chakna thin, Raebareli leh Amethi bakah Prime Minister Narendra Modi-a bial, Varanasi-ah Congress hian tan an la hle a. Kum 2019 inthlanah khan Gandhi-a hian Amethi-ah hian BJP vandidate Smriti Irani chu a lo hneh lo tawh nghe nghe.
Uttar Pradesh-ah hian Kanpur Nagar, Fatehpur Sikri, Basgaon, Saharanpur, Prayagraj, Maharajganj, Amroha, Jhansi, Bulandshahar, Ghaziabad, Mathura, Sitapur, Barabanki leh Deoria bialah Congress hi an ding dawn bawk a ni.