Arunachal Pradesh-a rorel lai, BJP chuan assembly-ah an tam hneh ta hle a, MLA paliin an party an zawm thar leh.
Congress leh Nationalist People’s Party (NPP) MLA pahnih ve vein BJP hi an zawm leh tak avang hian BJP hian assembly-ah member 56 zet an nei ta a, 60 awmnaah hian eptu chu Congress MLA pahnih leh independent pahnih chaih an ni ta a ni.
MLA paliin rorel lai an zawm hi Arunachal Pradesh-a assembly inthlan a hnaih mek laiin a ni a, Lok Sabha inthlanpui nen a ruala neih tur a ni.
Congress MLA peng tate hi Ninong Ering leh Wanglin Lowandong an ni a. NPP atangin Mutchu Mithi leh Gokar Basar ten BJP hi an zawm bawk a, Chief Minister Pema Khandu-a’n state khawpui, Itanagar-ah a lawm lut a. Assam minister leh Arunachal Pradesh inthlan tura BJP election in-charge Ashok Singhal pawhin a tawiawm bawk.
Ering-a hi West Pasighat Assembly bialtu a ni a, Wanglin Lowangdong-a hi Borduria Bogapani bialtu a ni ve thung a. Mutchu Mithi leh Gokar Basar te hi Roing leh Basar bialtute an ni ve thung.
Arunachal Pradesh assembly-ah hian member 60 awmin 56 chu rorel lai lam an ni ta a, a lan dan maiah chuan BJP hian hmarchhak state-ah hian thuneihna an chan leh ngei hmel a. Kum 2019 inthlanah khan bial 41 lain thuneihna an chang a ni.