Aizawl: PWD Minister Vanlalhlana leh Assembly Dy. Speaker Lalfamkima te chuan Inrinni khan Khamrang leh Buichali inkar kawng dinhmun an enfiah a, kawng chhe laite siam that dan tur an ruahman.
Sorkar thuchhuahin a tar lan danin, Khamrang leh Buichali inkar kawng hi km 14.80 a thui a ni a. A siamtu contractor Ratna Infrastructure Projects Pvt. Ltd. hian May 7, 2021 khan an thawk zo a. May 7, 2026 thleng khan enkawl zui tura tih ni mah se, November 16, 2021 khan Mizoram PWD chuan NHIDCL hnenah a hlan a. NHIDCL hian PWD leh Ratna Infrastructure Projects Pvt Ltd. te contract a la tawp loh avangin kut an thlak duh lo va, he kawng hi contractor hian enkawl zui mah se, August 25, 2023 atang khan an tawpsan a ni.
Contractor-in an tawpsan hnuah kawng a chhiat bawk si avangin PWD chuan helai kawng chhe zual hi boulder te hnawhin, a then lai chu concrete pavement siamin a thawk ta a ni.