Aizawl: Mizo National Front, General Headquarters hruaitu thar thlanna neih tur atana official candidate chhawp chhuah zingah, chawlh theih thu thlen ve ve pahnih zingah Zoramthanga hming a lan laiin, Sr Vice President Tawnluia hming a lang ve lo.
Inrinnia MNF Nomination Committee thukhawmin, hruaitu thlanna neih turah official candidate atan president ni lai, chief minister hlui ni bawk, Zoramthanga chu president-ah an chhawpchhuak a, Sr Vice President-ah Dr R Lalthangliana, Vice President ah Lalchhandama Ralte leh Vanlalzawma te bakah, Treasurer atan Lalruatkima an chhawp chhuak.
MNF Gen Hqrs hruaitu thlanna hi March 15, 2024 khian neih tur a ni.
Hetih lai hian, MNF Nomination Committee-in president atana official candidate an chhawpchhuah, Zoramthanga chuan tun hnai khan MNF party election nomination secretary hnenah party hruaitu nihna atangin an party thatna tur a nih chuan a chawlh theih thu a thlen a. Chutih rualin an hotute ruahmanna eng pawh a zawm theih thu a thlen bawk.
MNF president ni lai, Zoramthanga’n party hruaitu nihna atanga a chawlh theih thu a thlen rualin, Sr Vice President Tawnluia pawhin Zoramthanga hnung zuia chawlh a duh thu a thlen bawk a. Tawnluia erawh tun tuma MNF party hruaitu thlanna neih turah official candidate chhawpchhuak zingah a hming a lang ve ta lo a ni.