Aizawl: Land Revenue & Settlement Minister B Lalchhanzova’n Inrinni zingkar khan Civil Hospital, Aizawl-a damdawi in thli felfai zawka kaltir a nih theih nana ruahman, Bio-Digester Septic tank siamna tur hmun a enfiah.
Bio-Digester hi Civil Hospital, Aizawl thli felfai zawka kaltir a nih theih nan a ruahman niin, damdawi inah hian hman a lo ni tawh thin a; mahse, a siam dan a fuh tawk loh deuh avangin a bul hnaia chengte tan harsatna a siam thin avangin a thara siam tura ruahman a ni.
Bio-Digester Septic tank siam nan hian Rs 17,19,900 ruahman a ni a, a siam hna hi SIPMIU in an thawk dawn a ni.
Aizawl East II bialtu MLA B Lalchhanzova hian Dawrpui khawtlang hruaitute leh Civil Hospital hotute thawhhona tha tak neih zel a pawimawh thu a sawi a, damdawi in thianghlim leh mawi nei tur chuan mipui tana tha ber tihduhna thinlung put theuh a tul ber a, chutiang thinlung an put chuan thawhhona tha neih hi thil awlsam tak a nih thu a sawi.
Civil hospital hmunhma leh a chhehvel thianghlimna enzui tur Civil Hospital Superintendent kaihhruainain Dawrpui venga tlawmngai pawl hrang hrang aiawhte telna Consultation Committee din turin ruahmanna siam a ni bawk.
Minister hi Dr Zoramthanga, Medical Superintendent leh thawktu dangten an lo dawngsawng a ni.