Arunachal Pradesh a khelh mek Fifa Santosh Tropphy 2023-24-ah Sapui muthlu kaiharhin an awm a. Vawi hnih chak lo zawn tawh Mizoram chuan delhtu lian tak kara an khingpui Delhi chu 5-1 ngawtin an sawp a, Group B hmahruaitu an ni nghal.
Mizoram hi Group B-a a match hmasa pahnihah an chak zo lova, Maharashtra laka an tlawm hnuin Karnataka laka an hmahruaina an hum zo lova, an chak zo lo. An match hmasa pahnihah beisei an phak loh vangin duhkhawp an hlawh lo viau a, sawisel pawh an hlawh hman hle. Point li hmu tawh Delhi lakah an tlawm a nih chuan Mizoram hi tla tluk an ni tawh hial dawn. An chak lo leh a nih vaih chuan khaw eng hmu ngam lo khawpa sawisel a hlawh tawhin a rinawm hial bawk. Chung boruak pik leh rit takin a delh chungchuang huaisen takin an inlan a, Khuangchera zia pua inlan Mizoram chuan 5-1 ngawtin Delhi an sawp ta a ni.
Chak mamawh Mizoram tan hian Mc Malsawmzuala chuan hmahruaina goal a thun a, boruak rit lutuk a chhem kiang. MC-a goal thun atanga minute thum hnu lekah Mawlsawmzuala Tlangte chuan fuh taka tauh goal in an goal hnihna a thun a, Mizoram hmahruaina a tizau. Inhnaihchilh taka goal hnih an thun hian Mizoram team a fuih phur viau a, tha zual zawka inlanin, chawlhlawk hmain goal hnih dang an thun belh leh hman.
Minute 32-naah goal hmahruai thuntu Malsawmzuala chuan an goal thumna a thun a. Goal hmahruai thuntu MC Malsawmzuala chuan minute 38-naah an goal lina thunin an chak hmahruaina a tizau lehzual a. Si li fai ngawta hmahruai chungin chawlhlawk an hmang.
Chawlhlawk hnu lamah Mizoram an khel tha chhunzawm a, minute 67-naah Ms Dawngliana chuan an goal ngana a thun a, an chaka a nem nghet. Si nga fai ngawta hma an hruai tawh vangin team enkawltute leh player te thla a muang a, nuamti takin Delhi an hmachhawn. Point li hmu tawh Delhi hi hun tawp dawn hnaihah an vannei. Hun tawp dawn tep minute 90+2-ah Mohit Mittal chuan Mizoram laka an goal neihchhun a thun. Mittal goal thun hnu hian goal dang a luh belh tawh lova, an phu ang ngeiin Mizoram chuan hnehna an chang a, point thum an hmu ta a ni.
Delhi sawptu Mizoram hian khelh thum atangin point li an hmu a, Group B table chung ber an luah nghal. Thawhtan ni vek khan Railways leh Maharashtra an inkhel a., Karnataka leh Manipur an inkhel ve dawn bawk. Result kan tarlan hman loh inkhel hian Group B table a sawi danglam dawrh thei thung.
Mizoram hian February ni 29, Ningani chawhma dar 10:00 ah Manipur an hmachhawn zui leh dawn a. Manipur nen an inhmachhawn tur hi World Cup final tluka Mizote ngaihven a ni ang.