MNF Senior Vice President Tawnluia’n MNF headquarters hruaitu inthlan tur chungchangah an party dan angin an kal tih sawiin, MNF-in Zoramthanga uapna a la mamawh tih a sawi.
He thu hi nimina MNF party-in an office, Hnam Rûna inkhawm an neihah a sawi a, Tawnluia chuan MNF party hruaitu term a tawp apiangin official nomination siam thin a nih thu te, a duh tan floor atanga chuh theih a ni tih leh chuhtu an awm loh chuan official candidate-te tlingah puan thin an nih thu a sawi.
An party inthlanna neih tura president post-a official candidate, Zoramthanga uapna chu an party-in an la mamawh tih sawiin, “Ramri leh hnam issue-ah a hnathawh ang thawk an awm lo. Kum 15 lai chief minister lo ni tawh hi sulsutuah kan la mamawh,” a ti.
Official candidate-a a hming lan lo chungchangah a duh dan taka an telh tawh lo chu lawmawm a tih thu a sawi a; an party chu Mizo hnam party a nih angin ruling-ah awm lo mah se Mizo nationalism champion-pui turin an kal zel dawn tih a sawi bawk.
Thusawitu dang, MNF Adviser J. Malsawmzuala Vanchhawng chuan tlawmngai pawlten Free Movement Regime (FMR) duh lohna lantira an punkhawm hial tawh laia ZPM sorkar chet dan chu ngaihthat thlak loh a tih thu a sawi bawk a ni.