Lehlanga Mizorama tlawhtu, India Vice President Jagdeep Dhankar chuan nimin khan Mizoram Legislative Assembly session neih mekah thu a sawi a, Mizoram chu hmasawnna tam tak hmu turin duhsakna a hlan.
Vice president chuan Mizoram chu ram nuam tak leh hmun ralmuang tak a ni tih sawiin, a thinlungah a cham reng tawh tur thute, hmasawnna tam tak hmu tura a duhsak thu a sawi a. PM-DevINE scheme hnuaiah Rs. vaibelchhe 600 sengin Aizawl bypass road leh bamboo link road siam mek a ni tih te, PRASHAD Project hnuaia Chite-a Aizawl Convention Center sak tur leh bamboo link road pahnih siam tur chuan Mizoram chu tourism lamah a vawrh dawn tih a sawi.
Dhankar chuan Mizorama rorelna in sangah hmeichhe pathum an thu tel chu ropui a tih thu leh inchhuana tur a nih thu a sawi a, India rama rorelna in sang pawhin Lok Sabha leh Rajya Sabha chuan Lok Sabha leh state legislature-a hmun thuma thena hmun khat hmeichhiate tana reservation siamna tur, ‘Nari Shakti Vandana Adhiniyam’ a lo pawm tawh thu a sawi.
Vice president chuan India ram economy than dan sawi bawkin, kum 11 liam ta khan India ram economy chu khawvelah 11-na a ni a, tunah erawh a kum tela thangin pangana a ni tawh tih sawiin, ram lian zawka ngaih thin – Canada, UK leh France ramte hmaah a awm tawh a, kum thum vel a liam leh hunah chuan khawvela ecomony ram lian pathumna, Japan leh Germany-te ai pawha economy lian zawk a nih tawh an beisei tih a sawi.
Vice President Dhankar hian nimin zing dar 9:30 khan Lengpui Airport-ah tumin Chief Minister Lalduhoma leh sorkar hotu dangten an lo hmuak a, Mizoram University Convocation vawi 18-na a hmanpui nghal a, hemi hnu chhun dar 12:45 khan Mizoram Legislative Assembly House hi tlawhin thuchah a sawi a, nimin chawhnu khan Mizoram a chhuahsan leh nghal a ni.