- Ruata
Hyundai midsize SUV hmingthang Creta chu a N Line version thla thar ni 11-ah tlangzarh tura ruahman a ni.
N Line hi Hyundai lirthei chhuak mek te, a sports version niin kawng hrang hranga sports design tura khawih danglam leh tuaihnum nawn leh a ni a. N Line hi Hyundai lirthei hrang hrangah pawh kan hmu tawh a, Venue, i20 leh adangah pawh kan lo hmu tawh a. A mawiin kawng hrang hrangin a pangngai aiin a danglam a ni.
Hyundai chuan Creta N Line official booking hi rei lo teah an tan theih beisei a ni a. A man puan a nih hnuah dealer hrang hrangah an pechhuak zui tura ngaih a ni. Tunhnaiah hian Creta N Line lo chhuak mai tur hi an enchhin lai hmun hrang hrangah hmuh thin a ni a. Internet lamah pawh a darh nual tawh a, heng atang hian a nihphung tur hrang hrang a hriat theih thuak tawh a ni.
Creta N Line hi sawi tawh angin standard model aiin a danglam bik a. ‘N Line’ design element hrang hrang a nei a, hei hi model dangah pawh kan hmuh tawh angin a inang put hlawm a. Heng lirthei dang N Line kan hmuh thin hoin an neih ang hi a awm veleh ang a, a dangin an neih loh thil dang pawh kan hmu chho nual turah ngai ila. Chanchin kimchang tak pawh thla thar maiah kan hre tawh dawn a ni.
Kan hriat angin N Line tih chuan a ti lang sports car design turin a pawn leh a chhungah kawng hrang hrangin thawm a ni a. A hma aia grille te zawk a nei ang a, a bumper pawh a danglam ang a, air dam zau zawk a nei dawn a ni. He SUV thar turah hian headlamp assembly a neih sa chu a rawn hman chhunzawm zel hmel a, Creta pangngaiin a neih ang LED DRL te pawh kan la hmu zui zel dawn a ni.
Creta N Line profile hrang hrang turah hian side skirt lian zawk, red accent tel (N Line hi rawng senin an chei ‘sporty’ tlangpui thin) a nei ang a, 18-inch wheel design thar, N Line badging awm a hmang ang a. A hnung lamah chuan N Line lirthei dangah te pawh kan hmuh tawh ang, dual exhaust tip, diffuser, leh a hnung bumper tihdanglam deuh te kan hmu ang a, a chungah hian roof-mounted spoiler lian zawk a awm dawn bawk a ni.
Hyundai chuan Creta N Line-ah hian rawng duhthlan tur pahnih – Matte Gray leh Blue a awm dawn a. A chhunga a kentel hrang hrang te hi tuna chhuak mekin a neih ang a ni tlangpui a. Thil danglam tur deuhah chuan N Line lirthei dangte pawha kan hmuh thin ang, all-black interior theme, three-spoke steering wheel N Line logo chuang, N Line gear selector lever, leh metal pedal te bakah thildang hrang hrang kan hmu dawn a. A ti lang sports design lehzual turin N Line lirthei danga mi ang bawk dashboard leh dual screens vel cheimawitu red accent kan hmu leh dawn bawk a ni.
A khawl lamah chuan Hyundai Creta N Line hian 1.5L, 4-cylinder turbo petrol engine a nei ang a, hei hi 7-speed DCT (dual clutch transmission) gearbox nen thlunzawm a ni dawn a. Manual duh tan 6-speed manual transmission a thlan theih bawk a ni. Power pekchhuah lamah chuan 160bhp power leh torque 253Nm a pe chhuak thei a. He petrol turbo khawl hi a chak tha dawn hle a ni. Hyundai hian suspension setup, steering leh exhaust system te pawh khalh nuam lehzual turin N Line model-ah hian an tuaihnum leh dawn bawk a ni.
Hyundai Creta hi India rama midsize SUV-ah chuan hralh kal ber a ni mek a. Hetihrual hian midsize SUV dangte pawh hi India ramah hian lirthei huang hralh kal ber zinga mi a ni mek a ni. Creta-a N Line a lo chhuak leh tur hian market lamah company pawh a puih viau beisei a ni a, SUV che tha tak ni mek hi nasa lehzualin market lamah a rawn pui dawn em tih chu i han ngaichang zel teh ang.