MNF party chuan thuchhuah siamin, ni 29.2.2024 a Mizoram Rorelna sangber Assembly-a zawhbelhna a chhannaah Sports & Youth Services Minister Pu Lalnghinglova Hmar chuan RG Stadium a phullem thar phah chungchang MSSC President anih angin a hriatpui loh thu leh Work order engmah awm lo anga a chhuanchhe zawnga Member zawhbelhna a chhan dan atang khan a Department chan a hriatchian lohzia a lan bakah a phenah SYS Minister-in rilru thianghlim lo tak a pu tih a lang chiang hlein zawhbelhna a chhannaah hian a lang,an ti.
MNF te’n an sawi danin, RG Stadium a phullem hlui tawh chu AIFF in National level competitions khelhnan a pawm loh thu August 2023 velah hriat a ni a,nasa takin football associations/clubs te leh Mizo thalaite an mangang a nih kha.
Hetih mek lai hian Lunglei Zobawka Phullem phah tur chu National Green Tribunal(NGT) ten an phal lo a,a hmuna phullem dah pawh a rem ta lo a, chuvang chuan RG Stadium-ah urgent taka mamawh anih bawk si avangin Mizoram Sorkar SYS Department thutlukna angin RG Stadium-enkawltu Director, SYS Deptt chu Zobawk atanga RG Stadium a suan mai turin ziakin hriattir a ni a, Zobawka phah tura ruat sa Ms Decor India Ltd te tho chuan RG stadium zawkah an phah ta a ni, an ti a.
Hetianga ruahmanna siam anih takah chuan Zobawk Sports Academy NGT Case a fel veleha Phullem phah leh nghalna tur sum pawh MNF sorkar chuan a ruahman thlap a ni. Chuvangin RG Stadium a phullem phah hi Sorkar order ang thlapa tih a ni. Hemi chungchangah hian MNF sorkar thutlukna hi a fingin a tha hle a ni, an ti bawk.
SYS Minister thar hian infrastructure siambelh lama hma lak nat a tum loh thu a sawi fo hian Mizo thalaite rilru a tinaa, a tih nasat theih a rin loh vanga ‘intlawhkhalh lawkin grape te chu a thur thur nen’ a ti ta mai zawk em ni aw? tih hi Mizo mipuite zawhna a ni zawk e, tiin an thuchhuahah chuan an tarlang.