Markaz Subhanallah an ti a, India rama pawi nasa taka khawihtu, Jaish-e-Muhammed firfiak pawl hmunpui (headquarters) a ni a. Pakistan ram chhunga Bahawalpur-a awm a ni a, a hmun pawh a tha a, tunlai khawvel thil changkang hrang hranga thuam a ni.
Acre 3-a zau, Markaz Subhanallah an tihah hian JeM firfiak pawla mi 600 chuangte nuamsak taka an khawsak theihna hmun a awm a. An hotupa, Masood Azhar chuan kum 3 chhung he headquarters hi a sa a, tunlai thiamna tha ber ber hmanga thuam niin gymnasium leh swimming pool thlengin a awm.
Bahawalpur complex-ah hian JeM-a tel duh chu a duh duh luh theih a ni a, a hnu lamah India-in tun hnai lawka a bomb tak, Balakot-ah khan training tura tirh chhuah an ni thin.
Masood Azhar-a bakah hian a unaute, an chhungkhat laina hnaite awmna hmun a ni a, JeM-a an hotu lawk dang eng emaw zat chenna in a awm bawk.
He in lian leh changkang tak sak nan hian a awmna hmun province leh Pakistan sorkar atangin puihna sum an dawng ngei tih pawh hriat a ni a. Masood Azhar pawh hi sum tuakin Middle East, Africa leh UK-ah a zin kual nual bawk tih hriat tel a ni.
Markaz Subhanallah-ah hian JeM inkhawm pawimawh leh meeting pawimawh zawng zawng nghah vek a ni a. Zirtawpni apiangin Masood Azhar-a unaupa, Mufti Abdul Rauf Asghar leh an pawla hotu lawk dangten an member thalai zawkte chu Muslim Indona Thianghlima tel tura fuihna thuchah an sawi thin.
He heqaquarters ropui leh tha tak hi kum 2012 atanga sak tan kha a ni a, Pakistan-a Sharif-an thuneihna a chan lai, kum 2015 khan luah tan a ni a. Punjab province hi Sharif unaute vawk lal lenna hmun a ni nghe nghe.