MNF chuan thuchhuah siamin, Mizoram Legislative Assembly Session neih mekah ruling party-te khawsak danin mipui nuih a ti zain, beisei a bo hleah an ngaih thu leh house zahawmna tihniama che nawiah ZPM an puh.
An thuchhuahah MNF chuan, ZPM MLA thenkhat House-a kuhva lo thial nuau nuau te, Minister bengek lo hawlh mawlh mawlhte hmuh tur an awm nia tarlangin, “Speaker zahawm tak MLA-in dan an han hrilhfiah a, an han inhnial zuite kha House-a thil hmuh tur vang tak a ni. Member thenkhatin health care bill chungchang Health Minister an zawhna, Health Minister-in chan theih a nei miah lo leh House Leader chhang tura a ti ringawt maite kha a mak hle,” tiin House Leader-in a chhan deuh ngai minister hi chu an awm zeuh zeuh thin a, hetianga zawhna pumhlum chhan theih loh tawp House-a a thlen vawikhatna nia a lan thu an tarlang.
MNF chuan sorkar atanga bill lut, minister pakhatin a han hnial kalh chiam maite kha thil thleng ngai lo nia tarlangin, “Ama sorkar ngei rintawk lohna lantirna dik tak a ni. Hei lo pawh hi ruling MLA-te nawina sawi tur a awm nual. House Leader hoin thubelh chian dawl lo sawi an nei nual,” tiin House hi a zahawm a, thu belhchian dawl lo sawina hmun tur a ni lo tih hre turin ZPM MLA-te an chah.
Mizoram rorelna sang ber zahawmna humhim hram hram tur leh inzir ve deuh turin ZPM MLA leh minister-te ngenin MNF chuan, “Hetih rualin opposition MLA-te House zahawmna vawnhim kawngah leh an mawhphurhna hlen kawngah an fakawm kan ti takzet. Leader of Opposition kaihhruaina hnuaia sorkar khalh ngil kawngah leh sorkar kal lai thlawp an tul hunah thlawm kawngah a nachang an hriain, an thawhrimna a chhuanawm kan ti takzet. A bik takin MNF Legislature Party-te thil dik lo phawrh chhuah leh sawisel ngaihna huna an huaisenna a ropui kan tiin, khalh ngil ngai sorkar kan hrawn mek khalh ngil kawngah huai taka pen zel turin kan ring ngam tawk. An tan huaisen takin a ding reng dawn,” an ti.