Kristian Thalai Pawl General Conference vawi 60-na, Ngopa khuaa hman chu nizan khan a tiak a, ruihhlo do kawngah nasa zawka hmalak an rel a; aia upa inzirtirna kalpui an rel bawk.

Conference hi February 29, 2024 khan tan a ni a, March 2, 2024 khan Ngopa Chhim Veng Biak Inah neih a ni a, ruihhlo do kawngah Central KTP-in nasa zawkin hma la rawh se tih leh KTP member mipa, ruihhlo leh a kaihhnawih avanga thi an tam lutuk a lo tlem zawk nan hmalak rawtna chu pawm a ni.

Heng bakah hian Khatla bialin ‘Aia upa zah chungchang inzirtirna Central KTP-in hma la rawh se’ tih chu pawm a ni a, kumpuan thupuiah Zonuam Bial rawtna, ‘Zirna leh rawngbawlna’ tih chu pawm a ni a, Mamit bial leh Mamit Hmunsam bialin kum 2028-a KTP General Conference thlen an dil chu pawm a ni bawk.

Rorel inkhawm neih hmain kum 2024 atanga 2026 chhunga Central KTP hruaitu thlanna chu Synod Moderator Rev. R.Vanlalnghaka kaihhruaiin neih a ni a, thlan tlin tak mi 25-te atang hian office bearer turte chu ruat an ni ang a, chungte nizan inkhawmah puan chhuah an ni a, moderator-in Pathian hnenah a hlan.

Report inkhawma an tar lan danin kum 2023 chhunga KTP member boral mi 552 zinga 484 chu mipa niin, hei hi za zela 87.68% a ni a, hmeichhe boral 68 awmin, hei hi za zela 12.32 a ni thung a; member thi tamna ber chu Kawnpui Chhimveng Bial niin, mi 12 an boral.

Nupui pasal nei chhiarnaah chuan nikum 2023 chhung khan KTP member innei 3,460 an awm a, an zinga 1,541 chu Biak In hawnga innei an ni a, hmun danga innei 1,919 an awm bawk a ni.

Mizoram chhungah KTP Branch 904 awmin, KTP member hi mipa 1,04,736 leh hmeichhia 66,668 an vaiin, mi 1,71,404 an awm a ni.

Tun tum KTP General Conference-ah hian palai kal an thahnem hle a, mi 27,000 chuang palai an kalkhawm nia chhinchhiah a ni.

Lirthei chesualah a kal tur thi

AZL: KTP General Conference-a tel tur, mi pali chuanna scorpio (MZ01 M-5155) chu Saichal daiah Inrinni chawhnu dar 1:45 vel khan chesualin mi pakhat a thi.

Lirtheiah hian mi pali an chuang a, hmeichhe awm chhun, Rebecca Lalrinmawii (34) d/o Hmangaihthangi, Bawngkawn Shalom Branch KTP member chu a hmunah a thi a. Mi dang pathum (mipa vek)-te erawhin hliam na an tuar lo.

Lirthei hi kawngthlang mtr. 100 velah a lum a, Saichal khawtlangin an buaipui nghal a. Police pawhin an pan nghal a, Sub.Hqrs YMA, Saitual Kohhran Upa leh KTP hruaituten an buaipui zui a ni.

Inrinni tlai vekah ruang hi Saitual District Hospital-ah postmortem a nih hnuah Saitual Sub Headquarters YMA Committee Room-ah a ruang lak a ni a, thlahna hun hman a ni.

Rebecca-i hi Inrinni zan khan lumen a ni a. Pathianni chhunah vui a ni.