Inrinni zana English Premier League khelhah hmahruaitu Liverpool an chak zo lo teuh hle a, minute 90+9 a Darwin Nunez goal thun hmangin hnehna hlu an chang thei hram. Inrinni zana inkhel dangah Tottenham an chak laiin Chelsea an chak zo lo thung.
Table chung bera awm mek Liverpool hi table hnuai lama awm Nottingham Forrest hmachhawn turin City Ground-ah an lenglut. Mimuala inlan mah ni se Nottingham Forrest laka awlsam taka chak thei tura ngaih an ni. Tlang rin ang ngawtin Reds hian awlsam takin hnehna an chang thei bik lo va, an chak zo lo teuh viau zawk.
Carabao Cup champion thar Liverpool hi Nottingham Forrest lakah an khel tha viau naa, goal erawh an thun thei mai lo. An hun tha an hlah tlut tlut vangin an chak zo lo ringawt tura ngaih a ni hman hial. Chak zawk an awm thei dawn lo emaw tih hnu, minute 90+9-ah Mac Allister siam tha tak chu Darwin Nunez chuan fuh takin a tauh goal a, goal pawimawh zet thunin Liverpool a chakpui. Minute 9 lai pek belh a ni a, minute 9-naah goal an chhuah ta bawk si nen Nottingham Forrest hi an lawm lo zui hle nghe nghe. An khingpuite lawm lo viau mah se Nunez goal hmangin Reds hian point thum hlu tak an hmu a, an hmahruaina an tizau.
Inrinni zana inkhel dangah Tottenham chuan an mikhual Crystal Palace lakah si an phurh hmasak zet hnuin, 3-1 in hnehna an chang let.
Tottenham muala lenglut Crystal Palace tan hian Eberechi Eze chuan minute 59-naah hmahruaina goal a thun. He goal hian mualneitu Spurs an chhaihkawlh a, goal thun ngawt an thun zui ta hial. Spurs tan hian Timo Werner chuan minute 77-naah Johnson siamsak atangin goal a thun a, an si phurh a sut. Werner goal thun atanga minute thum hnu lekah Cristian Romero chuan hma an hruai letna goal a thun leh nghal zat.
Inhnaih chilh taka goal an thun zawn hnuin Tottenham an khel tha zui viau a, goal pawh an thun leh thuai. Minute 88-naah captain Son Heung-Min chuan an goal thumna a thun a, an chakna a nem nghet. Son goal thun hnu hian goal dang a luh belh tawh lova, Tottenham chuan 3-1 a hnehna changin, top 4 huang luah phak an beiseina an chawk nung thar leh zual.
London club lian Tottenham an chak lai hian inkhel dangah Chelsea an chak zo lova, Brentford nen 2-2 in an inhnehtawk.
Gtech Community Stadium-a lenglut Chelsea hian bul an tan tha a, Nicolas Jackson chuan minute 35-naah hmahruaina goal a thun. An mualah hnufual zawk an nih hnuin Brentford an insiamtha a, goal hnih an thun zawn. Mads Roerslev chuan minute 50-naah goal thunin an si phurh a sut a. Yoane Wissa chuan minute 69-naah hma an hruai letna goal a thun zui leh bawk. Hnufual zawk an nih hnuin Chelsea in goal thun ngei tumin tan an khawh zui a, minute 83-naah Axel Disasi chuan goal thunin an si phurh a sut a, 2-2 in an inhnehtawk zui ta a ni.
Inrinni zana inkhel dangah Aston Villa chuan an khingpui Luton Town chu 3-2 in an hneh a, palinaah an insawh nghet. Villa chak rual hian West Ham United pawhin mualneitu Everton lakah si an phurh hmasak zet hnuin Goodison Park-ah 3-1 in hnehna an chang let ve bawk, point thum an hmu.