Chawlhkar tawp, Zirtawpni, Inrinni leh Pathianni khan Europe khawmuala league lian zual panga khelh a ni a. USA tualchhung league Major League Soccer (MLS) khelh a ni a, Cristiano Ronaldo boruak lenna Saudi Arabia Pro-League khelh a ni bawk. Kar tawpa football hnuhma langsar deuh deuh kan thlir kual leh ang.
- English Premier League
Pathianni zan khan Etihad Stadium-ah Manchester derby khelh a ni a, inkhel hmuhnawm takah mualneitu Manchester City chuan si an phurh hmasak zet hnuin 3-1 in Manchester United an lehthal. United hian Pathianni zana inkhel an hmachhawn bikah chawlhlawk hmaa an hmahruaina an chakpui thei viau a. City lakah an tlawm hi kum 2014 hnu lamah pathiannia inkhelah chawlhlawk hmaa hma hruai chunga an chak zawh loh vawi khatna a ni hial.
Etihad Stadium-ah City an hmachhawn tum hian United forward Marcus Rashford chuan pui zetin hmahruaina goal a thun. Rashford hian EPL-ah bik City laka goal nga a thunna chiah a ni a. City lakah goal a thun emaw, assist a neihin emaw United an la chak ziah a, Pathianni zanah erawh an tlawm ta tlat thung.
Inrinni zan khan EPL hmahruaitu Liverpool chu Nottingham Forrest lakah an chak zo lo teuh hle. Hun tawp dawn tep minute 90’+9-ah Darwin Nunez chuan Liverpool chakna goal a thun nawlh. Nunez hi EPL chanchinah chakna goal thun tlai ber a ni a, record thar a siam.
- Spanish LaLiga
La Liga-ah hmahruaitu ni hman hial Girona chu Pathianni zan khan Mallorca hneh lovin an tlawm. Girona hian an khelh hnuhnung parukah chak zo lo vekin, point hloh an nei vek a. Season kal mekah khelh thum chhung an chak theih loh zawnna hmasa ber niin, hun harsa an tawk mek.
Champion lai FC Barcelona chu season kal meka Mimualah vawi 13 zet tlawm an nei lo zawn tawh a. Season kal mekah Mimuala vawi 13 tlawm lo zawn awmchhun an ni a. Europe’s top 5 league-ah tlawm nei lova khelh 13 kal tluang team li zingah an tel bawk a, PSG, Bayer Leverkusen leh Inter Milan te hnung an zui.
Alvaro Morata chuan season kal meka inelna hrang hrangah goal 20 a thun tling der tawh a. Hei hi season a hman that ber tum, season tluana goal a thun zat a ni der tawh. 2016-17 leh 2020-21-a a record siam a khum ngei dawn niin a lang.
La Liga hmahruaitu Real Madrid chu season kal mekah khelh 21 chhung tlawm nei lovin an kaltluang tawh a, september 2010 hnu lamah inelna hrang hranga tlawm nei lova an kal tluan rei ber tum a ni a. 2011-12 hnu lamah La Liga-ah bik tlawm nei lova an kaltluan rei ber tum a ni tel bawk.
Atletico Madrid chu La Liga-ah khelh 25 chhung tlawm nei lovin an kaltluang ta chiah a, hei hi kum May 2013-Nov. 2014 hnu lamah tlawm nei lova an kal tluan rei ber tum a ni a. Hemi kum hian khelh 27 chhung tlawm an nei lo.
Inrinni zan khan Sevilla chuan 3 – 2 in an mikhual Real Sociedad an hneh. Sevilla chakna goal hi minute 66-naah Sergio Ramos thun a ni. Ramos hian La Liga-ah goal 76 a thun tling ta chiah. La Liga goal 76-na a thun hian kum 37 leh ni 338 a upa a ni a. La Liga-ah Sevilla chakna goal thun thei upa ber a ni nghal.
- Italian Serie A
Pathianni zan khan Napoli chuan an mikhual Juventus chu 2-1 in an hneh. Napoli hian Serie A club lian Juventus hi vawi nga an hneh zawn ta chiah a. Napoli hian Juventus laka an chak zawn rei ber record thar an siam.
Club lian zawk ten an hmuhtaih em em Victor Osmihen chuan Napoli a zawm hnuin Serie A -ah goal 60 a thun tling der tawh. Nigeria forwrd hi Napoli player zingah Serie A-ah season li chhung a zawna goal 10 chin thun zel thei pathumna a ni a. Diego Armando Maradona (between 1984/85 – 1987/88) leh Attila Sallustro (between 1929/30 -1932/33) te hnung a zui.
Serie A club lian Inter Milan chuan season kal mekah goal 65 an thun tling der tawh a. Season kal meka Europe’s top 5 leagues club zingah league goal thun hnem ber an ni a. An hnuaiah hian goal 63 thun tling tawh Liverpool leh Bayern te an awm.
Paulo Dybala chuan Serie A-ah goal 122 a thun tling ta chiah a. Argentina player zingah Serie A-a goal thun hnem pangana a ni a, goal 121 thun tling tawh Mauro Icardi goal thun zat a khum chiah.
- German Bundesliga
Champion lai Bayern Munich chuan zirtawp zana an khingpui Freiburg an inhnehtawkpui a, point an hloh. Bayern hi an khelh hnuhnung pangaah an khel chhe viau a. Inelna hrang hranga an khelh hnuhnung pangaah vawi khat chiah an chak. Champions League last 16-ah Lazio an hneh lo leh a nih chuan an manager Thomas Tuchel an ban tawh dawn niin sawi a ni.
Stuttgart forward Serhou Guirassy chuan season kal mekah Bundesliga goal 20 a thun tling der tawh a. Season kal meka Europe’s top 5 league-ah amah aia goal thun tam awmchhun chu Harry Kane (27), Lautaro Martínez (23) leh Kylian Mbappe (21) te chiah an ni.
Hmahruai mektu Bayer Leverkusen chu Bundesliga-ah khelh 24 chhung zet tlawm nei lovin an kal tluang tawh a, hei hi an club record a ni a. Bundesliga-ah tlawm nei lova kal tluang rei ber Bayern Munich record 28 chu khelh liin an la phak lo. Leverkusen hi inelna hrang hrangah khelh 34 chhung ngawt tlawm nei lovin an kal tluang tawh thung a. German club record an siam bakah AC Milan (1991-92) record an tluk a. Europe’s top 5 League-ah tlawm nei lova kal tluang rei palina an ni tel bawk.
- Messi-Ronaldo
Major League Soccer lakah Lionel Messi a vul a, 5-0 a Orlando City an sawp tumin goal hnih a thun. Messi hian league bikah club tan goal 500 a thun tling chiah a. Inelna hrang hrangah club leh ram tan goal 824 a thun tling chiah bawk.
MSL lamah Messi a vul lai hian Cristiano Ronaldo erawh chu a goal lawm dan mawi lo vangin hrem a ni a, inkhel thei lovin a lo awm ve thung.