- Kima Tuallawt
“Ârnawta a chhuak dawn,Årnawta”
“Tu nge Ârnawta?”.
“Hmanhmawh rawh,gate an kalh chuan a pawi dawn lutuk”.
Cinema ka vawi khat en na.
Khatla kawn kan chhuak chho,a kum chu sawi lo ta i la. Sikulpuikawn lam kan pan chho a,Gorkha School kan pêl hret a,P.P John-a in zâwn,step bûng zetah khian kan lawn a, Pawl Sarih ka ni,kan hlim khawp,kan bengchheng viau,kan inkhâp. Pasarih lai em maw kan nih tak kha le. Mual min liamsan tawh pawh an awm ta nuk mai.Kha zân khan kan ri chelchul a, Central Y.M.A office thlangah kan chhuak a,Sabinga lung lam panin kan vêi phei leh.
Cheng nga,cheng sawm,sawmpanga a lo ni. Ticket man tumahin kan nei lo hrim hrim. Kan zing a luhruk lo expert tawh ho an han che tak tak mai kha chu,kawng hi a kaw duak duak mai a ni. Main gate leh kawngkapui inkar a kan film en tur chetna hrang hrang poster an tar(display) chu an va hnaih hriau hriau a,khatih hunlai gate keeper kha,Pu J.F Laldailoa(L)u fapa,pa Zohminga(L) hi a ni tih kum sawmpathum kal ta vel khan ka hre leh hnuhnawh a. Tunah chuan mual a liam ta. Muang in chawl se.
Kawngkapui leh gate hmasa zawk thir gate pawhtawlh chi inkar verandah-a Poster chu thian te chuan an va en kual vel a,min lo hûi pah zeuh zeuh a,ka va lut ve a. Vengtupa lah chu a thinchhe nasa mai si a. Ka hriatchian hnu khan a lo thinchhe tak tak si lo a. Chu zanah chuan kan lut kim thei thlap.A hnu thleng a luhruk zirlai ka passed nachhan. Kan ti ve deuh mah mah em maw ni,cheng nga man,seat dup awm lo atang seat nuam deuh zawk cheng sawm manah kan insawn a. Kan chet spy zia kha aw! A chhawng chung cheng sawmpanga manah kan han insawn leh vel a. Security te khan torch light-in min rawn chhun a,”khawiah nge in ticket”,min ti a,”e he! ka lo paih daih tawh a”,kha kan han ti ngei a,thian dang te lah khan,’keipawh, keipawh’,kha an han ti tliar tliar a.A hma a briefing kan neih that em vang a ni.
Ârnawta a ni reng reng lo. ARNOLD SWARZENEGAR,Arnold-a alawm. Kha film Hming kha ka hre tawh lo. City Bus tiat deuhthaw khan bang sei lian tawk(an vaw thiat ta) ah khan Ârnawta chu a rawn lang ta a nia. Big Screen ka vawikhat en na.
Interval a lo ni,a hma a thim khûp kha an han on pup a,an au dur dur a. Music a lo ri, Smokie ngei mai,”for a few dollars more, don’t play your Rock n roll to me ….”an han play têng chhuai chhuai a. Chu hla pawh chu chiang taka ka vawi khat hriatna bawk. A nuam asin. Cinema hall chhung bang leh pawn lam bang inkarah mipa leh hmeichhe zun in panna kawng a awm a,Zun In a hing si, meizial an zu khu luih luih a,zu an in,lo inkuah uluk tawk tawk lah bo lo. Kan chikim asin. Mi fa te hi an lo va han advance.
Luh dar a lo ri leh ruai ruai a,light an down a. An au leh.Kan enchhunzawm leh. Tidaih teh ang.TITANIC rawn chhuah hlim khan,ka thianpa nen Sat.P.M show(2:00 P.M) hi kan en a. A zo,kan han chhuak chiah mai chu,a film a lo sei bawk nen,khua hi a lo thim vek tawh a. A ni College veng a haw tur,kei … . ke ngat in,mak kan tilutuk meng â ruai lai vel kha.
Hâk kan zauh zel a. ZODIN CINEMA HALL-ah te,A.R-ah te khan kan lut ru tazel a,a tawp lamah phei kha chuan expert ve tawh tak ka ni. Pushpak kan luhruk tum a vai film kha chu a hmuhnawm loh ber awm e.
ZODIN kha Ticket Blacker an hrâng a,Brooke Shields no nalh chhoh lai,”Blue Lagoon”,te mawlh kha.(kum sawmpasarih vel lek a nihlai an ti hialin ka hria) Entu ho kha an khêk tuarh tuarh a,a lunglenthlak mang e. Kum kaw kal ta vel khan ZODIN CINEMA HALL hlui ka lut leh a, second hand zuar hoin belt hawn nan an lo hmang a,lung a leng duh khawp mai. Tunah phei chuan mitthla ah chiang viau mahse,hmu pha ve lo tan chuan a awm thin tih pawh hriat theih tawh loh khawpin parking lot atan an siam dawn ta a. A ngaihawm ve duh vung vung roh thin.
Van Damme-a channa, “Street fighter”,Will Smith-a,”Independence day”,te,”i know what you did last summer”,te,Jet Li,Desperado,ka hre seng tawh lo.
J.L Cinema Hall ngei mai hi,ka pel ngun si a,ka pelh apiang hian ka lung a len loh leh eng emaw titak hian ka awm ziah. Ka lung a tih len êm thin vang a ni zawk ang. Tunah zawng,a building te chhut thiat a lo ni tawh a,a bang hmai leh a luhka lam chiah,nunhlui suangtuahna chawk tho tawk lekin hmuh tur a awm ta. “J.L CINEMA HALL”,tih erawh chiang lo ruai in a la inziak ve chang chang chauh tawh a ni e.
Mangtha,J.L CINEMA HALL.