Kartawpah khan Pakistan hmun kilkhawr laiah ruah surin rin loh takin vur a tla bawk a, mi 35 velin an thih phah.
Thi zinga 22 hi naupang an ni a, a tam zawk hi leimin an chenna in a chhilhte an ni tih disaster management thuneitute chuan an sawi.
Khaw awm dan uchuak tak hian Pakistan hmar leh khawthlang lam a nuai na zual a, kawng a ping a, chenna in tam tak a chhe bawk.
Mi thiamte chuan March thlaah hian dan pangngaiah boruak a uap em em thin a, hetiang hunah hian vur a tla hi thil mak a nih thu an sawi.
An ram meteorological department-a director thin, Mushtaq Ali Shah chuan sik leh sa inthlakin a nghawng chhuah a nih a rinawm thu a sawi.
Rial tlem azawng tla erawh a awm thin a, hetiang hi chu a hun pawh a rei ngai lo va, thil mak a nih loh thu a sawi a; mahse, darkar chanve chuang vur tla chu thil mak a nih thu a sawi.
Hmarthlanga Khyber Pakhtunkhwa province-a Kirk district-a cheng, Hajit Shah chuan tun ang huna an venga vur tla chu a hmain vawi khat chiah a la hriat thu a sawi.
“Ka hriat theih chinah hetiang hi chu kum 25/30 vel liam tawha a thlen bak kha a la thleng lo niin ka hria,” tiin BBC a hrilh.
Ruah tam tak surin chenna in 150 vel a tichhe vek a, a vaia tihchhiat loh in 500 vel a awm bawk a. Hengte hi a tam ber chu Khyber Pakhtunkhwa leh chhimthlang lama Balochistan province-ah a nih thu thuneituten an sawi.
Electric pawh ni eng emaw zat chhung chu district thenkhatah chuan a awm thei dawn lo.
Khyber Pakhtunkhwa-a province sorkar chuan a tuartute chhawmdawlna a pe nual tawh a, hliam tuar leh nunna chan chhungte pawh zangnadawmna sum an pek tur thu an puang.
Pakistan-a meteorological department-in kar tin khaw chin thlirna a tihchhuahah tun kar chhung hian an ram hmun tam zawk chu ‘a vawtin a ro dawn’ niin an sawi a. Balochistan leh Kashmir hmun thenkhatah chuan tlangramah ruah a sur thei niin an sawi bawk.