- Ruata
Hyundai chuan an sub-compact SUV lar leh hralh kal, Venue chu Executive Turbo variant thar, manual transmission nen an tlangzarh.
Hyundai Venue hi Mizoramah tak phei chuan sub-compact SUV kan neih zinga hralh hnem ber pawl leh lar ber pawl a ni a. India ram pum huap ang pawhin market lamah a che tha hle a ni. Mizoramah chuan car te chi lei thin tam takin an lei zawk fo a, sub 4 meter SUV kan tih huanga mi a nih avangin man to uchuak si loin SUV nihphung felfai tak nei, lian lutuk ni bawk si lo a ni a. Hei hi lirthei leitute tam tak pawhin an duh chhan leh an lei chhan a ni. Tunah hian a variant changkang ni bawk, turbo khawl nei bawk thar an rawn tlangzarh leh ta a ni.
Hyundai Venue Executive Turbo variant hian 16-inch dual-tone wheel a nei a. A design-ah hian thlak danglam tlem tlem awmin dark chrome front radiator grille, roof rail leh shark fin antenna te a nei a. ‘Executive’ emblem hi a tailgate-ah a chuang vang bawk a ni. A chhunglamah hian he SUV thar hian front centre armrest thil dah theihna storage awm tel, 2-step rear reclining seat leh adjustable headrest passenger zawng zawng tan a nei a ni.
Venue Executive variant in a kentel hrang hrang zingah hian 8-inch touchscreen infotainment screen with wireless Android Auto & Apple CarPlay voice recognition awm tel bakah, digital cluster with color TFT MID, multi-functional steering wheel, cruise control, rear AC vents leh rear wiper & washer te a nei a ni.
Himna lamah chuan Hyundai Venue Executive Turbo variant hian airbag 6, a seat zawng zawngah 3-point seat belt with seat belt reminder bakah ESC, VSM, Hill-Assist Control, IRVM, automatic headlamps leh tyre pressure monitoring system te a nei a ni.
A khawl lamah chuan 120PS power pechhuak thei leh 172Nm torque pechhuak thei, 1.0-litre 3-cylinder turbo petrol engine with Idle Stop & Go (ISG) feature te a nei a. 6-speed manual gearbox nen thlunzawm a ni.
Hyundai hian Venue S (O) Turbo variant chhuak mekah thil hrang hrang an rawn dah belh bawk a. Electric sunroof leh Map Lamp (driver leh passenger te tan) an rawn dah belh a. 1.0L T-GDI engine, 6-speed manual leh 7 speed DCT transmission duhthlan tur a nei bawk a ni.