Mizoram Pradesh Congress Committee (MPCC) president thar, Lal Thanzara’n central-a sorkarna chelh mektu, BJP sorkarin hnam tenau zawk leh sakhaw tenau zawkte dimna nei miah lova dan hmanga a sawisa thin chu tihbo a tul takzet tih a sawi a, chumi atan political party, NGO leh kohhran te a sawm.
Nimin khan Aizawl Press Club-ah thu thar thehdarhtute kawmin MPCC president chuan kum 2019-a Lok Sabha inthlan dawna BJP-in an intiam angin India rama Citizenship Amendment Bill (CAB) hman te, Uniform Civil Code (UCC) hman te, Muslim temple awmna, Ayodhya rama Ram Temple sak te leh sakhaw pakhat atanga sakhaw danga inleh phal lohna dan, Anti Conversion Act te chu an pawm tawh a. Heng dante hi an intiam ang ngeiin tihhlawhtlin an tum zel a, an tihlawhtling mek zel bawk tih a sawi.
Lal Thanzara chuan CAA hmang te, UCC hmangte, Anti Conversion Act hmangtea Kristiante an bei chamchi mai chu tihtawp a ngai tih sawiin, “Kan titawp lo a nih chuan kan la ral mai ang tih a hlauhawm a ni. Kan ram danpui, constitution-a mi, secularism paih bo an tum hi Kristiante tihchhiat vek an tumna hmanrua a ni a. Chuvangin, kan tanrual a ngai a ni,” a ti.
Central-a BJP sorkar paih thla tura tan lak a ngai tih sawiin MPCC president chuan, “Congress party-in Mizoram Secular Force a din a, political party hrang hrangte, NGO te, kohhran hrang hrangte lo tel turin kan sawm vek che u a; kan ram, kan hnam, kan sakhua a himna tura pheikhai rual taka tanhopui atan kan sawm che u a ni. Kan sakhua, kan Kristianna a him zel theih nan thi leh thau pawlha kan tan a ngai ta tak meuh meuh a ni,” a ti.
MPCC president chuan kum 2018-a Myanmar ram nena awlsam taka intlawhpawhna turin MHA chuan Free Movement Regime a siam a. He dan ang hi chuan Mizote pawh Myanmar ram chhung, ramri atanga teha km 16 thlengin zalen taka inkalpawh theih a ni chu Zo hnahthlakten an hmang tangkai hle tih a sawi a. Sorkar laipuia Ministry of Home-in FMR tihbo a tum chu an duh lo thu leh theihtawpa do zel an tum thu a sawi.
Union home minister-in Myanmar nena Mizoram ramri hung an tum chu pawi a tih thu sawi bawkin, “Hnam khat, thlah khatte min thendarh a, tuna kan inpawh leh thei ta hi kan lawm tehlul nen, min thendarh zawnga India sorkarin hung a tum leh ta mai hi kan duh lo tak zet a, kan do zel dawn a ni,” Lal Thanzara’n a ti bawk.