March 5, Thawhleh zan khan UEFA champions league last 16 second leg khelh a ni a. Bayern Munich leh Paris St-Germain ten hnehna changin quarter-final a lut. An mualah si thum faia an chak vangin Bayern Munich manager Thomas Tuchel an ban a pumpelh a ngaih a ni.
Europe a team lian, German champion Bayern Munich hi season kal mekah an khel tha tawk lova, trophy lian lak nei lovin season hmang tluan thei dinhmunah an ding. Champions League last 16-ah Lazio hneh lova an tlawm vangin an boruak a hniam leh zual a. Second leg-ah chak lo va, quarter-final an lut zo lo a nih chuan an manager Thomas Tuchel an ban tawh dawn niin thu thang a awm hman hial. Chak mamawh tak chungin an mualah an inlan a, si thum faiin hnehna an chang a, quarter-final an inhlangkai.
Allianz Arena-a inkhelah England captain Harry Kane a langsar leh viau a, Bayern goal thun khawl Kane hian goal hnih a thun. An mualah hnehna chan ngei tuma inlan Bayern hian goal thun thuai lo mah se chawlhlawk hmain goal hnih an thun hman. Minute 38-naah Guerreiro siamsak atangin Harry Kane-an hmahruaina goal a thun a. Chawlhlawk dawn hnaih minute 45+2-ah Thomas Muller chuan an goal hnihna a thun zui leh bawk a, si hnih faia hmahruai chungin chawlhlawk an hmang.
Chawlhlawk hnu lamah Bayern Munich an khel tha chhunzawm a, goal an thun belh leh thuai. Minute 66-naah Harry Kane chuan an goal thumna a thun a, an hmahruaina a tizau. Inkhel hmuhnawm zui viau mah se hun tawp thlengin goal dang a luh belh thei tawh lova, Bayern Munich chuan si belhkhawmah 3-1 a Lazio hnehin quarter-final a lut.
Lazio laka goal hnih thun Harry Kane khan a club thar Bayern Munich tan inelna hrang hrangah vawi 33 a khel tawh a, goal 33 a thun tling chiah bawk. Bayern tana vul tak Kane hian champions league-ah goal 50 a thun tling ta bawk a, English player zingah UCL a goal 50 thun tling thei hmasa ber a ni.
Thawhleh zana inkhel dangah Paris St-Germain chuan an mualah si hnih faia an lo hneh tawh Real Sociedad chu Reale Arena-ah 2-1 in an hneh a, si belhkhawmah 4-1 a hnehna changin quarter-final an lut.
Season tawp ruala Parc des Princes chhuahsan tur Kylian Mbappe chuan PSG tan a pawimawhzia a lantir nawn leh a, Real Sociedad lakah goal hnih a thun. PSG hian Mbappe tel lova khawsak zir mamawh viau mah se, chak an duh lo thei si lova, Mbappe bawk an chakpui lo thei rih lo. Reale Arena a lenglut PSG hian bul an tan tha viau a, minute 15-na lekah Kylian Mbappe chuan Dembele siamsak atangin hmahruaina goal a thun. Mbappe hian minute 56-naah Lee Kang-in siamsak atangin an goal hnihna a thun zui leh bawk.
An mualah si hnih faia hnufual tawh Real Sociedad hian an si phurh sut tumin tan an khawh nasa viau a, hun tawp dawn hnaihah an vannei. Minute 89-naah Mikel Merino chuan goal thunin an si phurh a sut then. Goal an thun vangin Sociedad hi phur thar viau mah se goal dang an thun belh thei tawh lova, PSG lakah 1-4 a tlawmin quarter-final an lut zo ta lo a ni.