Labour, Employment, Skill Development & Entrepreneurship (LESDE) buatsaih ni hnih awh State Level Skills Competition chu nimin khan khar a ni a. State aiawha National Level Competition tel turin mi 16 thlanchhuah an ni.
LESDE Department Addl. Secretary K Lalhmingliana chuan Mizo te skills lama san zia sawiin, “India ramah pawh langsar tham kan awm thei” a ti a. Skills hmanga ram leh hnam nasa taka chawikan theih a nih thu a sawi.
Thalaiteah Skill development lama harhtharna a thleng zel nia sawiin, heng avang hian ITI-a zir duh te pawh an inchan vek lo thin niin a sawi a. Lehkha zir rualin thiam thil zirna lam ngaihpawimawh a tul thu sawiin, state aiawha Skills Competition-a kal tur te chu ram leh hnam tan an thiam thil nasa leh zuala tipunga, theihtawp chhuah turin a chah a ni.
Khawvela skills lama intihsiakna lian ber Skills Olympic an tih bawk Worldskills Competition 2024, Lyon, France-a neih tura India aiawh tur thlanna Indiaskills Competition-a tel turin State aiawh Intihsiakna chu March ni 5 leh ni 6 chhungin Aizawl hmun hrang hrangah kalpui a nih thu a sawi a, mi 47 in trade hrang hrang hnuaiah intihsiak hmachhawnin, a a hnuaia tarlan te hi State aiawh tura thlanchhuah te an ni :
Lalchhanhima – Cooking
Vanlalhriatchhungi – Beauty Therapy
Vl Hruaizeli – Health and Social Service
Lallawmkima – Electrical Installation
C.Rosangpuii – Bakery
Malsawmsangi – Patisserie & Confectionery
Liansangrem – Plumbing & Heating
Laltlanzovi – Hair Dressing
Anthony Lalchhanhima – Drone film making
Jonathan Vanlalrinchhana – IT Software solution for business
Samuel Lallawmzuala – Painting & Decoration
Emily VL Thakimi – Fashion Technology
Lalthachhungi – Visual Merchandising
Lalhriathlua Ralte – Electronics
Vanlalbikdiki – Shoe making
Maximus Lalruatdika – Floristry
Thlanchhuah te hi thla khat chhung an trade theuhah chher hriam belh an ni anga, kumin April thla tawp lama National Competition awm turah Mizoram ai an awh ang.