Jal Shakti Minister Gajendra Singh Shekhawat chuan India ram chhunga thingtlang chhungkua 75% chuan an inah tui herh haw tur an nei tawh tih Ningani khan a sawi.
Shekhawat chuan ‘mel lung pawimawh tak’ a nih thu sawiin state tinte chu tum hlenchhuak tura an beihna kawngah lawmpuina a hlan.
“Kan zinkawngah mel lung pawimawh tak phunin 75% kan tlin ta a. State tin leh Jal Jeevan Mission-a team tinte Prime Minister Pu Narendra Modi-a hmathlir tihlawhtlinga in tina tui herh haw tur awm tura beitute ka lawmpui a. Vawi khatah pakhat zelin kan intichak zel a, Bharat hrisel zawk kan siam ang,” tiin X-ah a tar lang a ni.
Sorkarin a chhinchhiah dan chuan thingtlanga chhungkaw 19,27,94,822 zinga 14,46,57,889 chuan tui herh haw tur an nei tawh.
State leh union territory (UT) 11 phei chuan thingtlang in tinah tui herh haw tur hi an pe thei vek tawh nia tar lan a ni bawk.
State leh UT 15 chuan 75-100% puitlin tawhin state paruk chuan 50-75% an pe thei tawh a. State pahnih – Rajasthan leh West Bengal erawh 50% hnuai lamah an la awm thung a ni.
Jal Jeevan Mission hi kum 2019-a bul tan kha niin kum 2024-ah thingtlang in tinin tui thianghlim in tur herh haw tur neihtir tuma hmalakna a ni.