- Ruata
Offroad adventure leh SUV lian tam ngainatute nghahhlelh, Toyota Fortuner thar (new generation model) chu tichhuak turin Toyota lamin hma an la mup mup tawh a, nakumah tlangzarh hman beisei a ni.
Toyota Fortuner hi Mizorama kan hmuh theih SUV-ah chuan a to pawl leh tha pawl a ni a. Tuna chhuak mek design ang hi a chhuahna a rei ve leh ta viau a. Tunah hian a thar hlak, chhuan thar model kan hmu chho leh dawn niin a lang a. Kumin chhung hian khawvel hmun dangah chuan an tihchhuah hman beisei a ni a. India ramah chuan kum 2025 lamah a chhuah theih hmel a ni.
Fortuner thar lo chhuak tur hian eng nge a ken tel dawn tih leh eng ang design nge a put dawn tih hi sawi chian theih a la ni lo na a beisei lawk thil hrang hrang a awm a. Toyota Fortuner thar lo chhuak tur chungchangah hian hriat lawk theih ang ang leh beisei theih tur hrang hrang kan han tarlang dawn a. Tum tumah chuan thil 5 kan lo beisei theih tur kan tarlang deuh ber dawn.
- Design thar leh platform thar
A design thuah chuan Toyota Fortuner hi Toyota SUV dangte aiin tuna chhuak mekah hi chuan a danglam viau a. Tuna Toyota SUV tha kan hmuh ho, Toyota Tacoma pickup chhuak thar te, Toyota SUV dang thenkhat Tundra, Land Cruiser 300 leh Sequoia te hmel ang a rawn put ve tawh beisei a ni a. Hetah hian headlamp design thar hlak bakah a hma grille, bumper leh a housing thlengin design thar kan hmuh hmel a. Alloy wheel design thar bakah a hnung bumper leh taillamp design thar te kan hmuh hmel a ni. Fortuner thar hi a hmaa chhuak aia nghet leh khalh nuam zual turin a nghahchhan (platform) thar Toyota TNGA-F platform-ah an nghat dawn bawk a ni.
- ADAS suite
Tunhnaia lirthei changkangin an neih ang, Advanced Driver Assistance System (ADAS) suite hmanga thawm a ni dawn bawk a. Hemi hnuaiah hian automatic emergency braking, adaptive cruise control, automatic parking assist, lane departure warning, blind-spot detection, leh forward collision warning te a awm dawn a. A himin a changkang dawn hle.
- Vehicle Stability Control (VSC)
A lirthei ti nghet lehzual tur leh chetsualna hrang hrang, lirthei let leh lum awlsam tur venna hmanraw changkang tak mai, Vehicle Stability Control (VSC) hmanga thawm a ni dawn a. Hei hian chetsual thulah pawh him takin lirthei a veng thei dawn a ni.
- Electric Steering
Tuna chhuak mek tein a hman thin ang, a steering wheel lama traditional hydraulic unit a hman thin chu electric power steering hmanga thlak a ni tawh dawn a. Hei hi a hman chuan power steering fluid a hman tawh dawn loh bakah nasa takin lirthei khalhtu chu he khawl changkang hmang hian a pui dawn a. Hei hian a lirthei tui ei nat zawngah pawh a tha zawngin nghawng a nei dawn a ni.
- Hybrid Powertrain
A khaw lamah chuan hybrid khawl hrang hrang – 265hp power pechhuak thei 2.4L turbo petrol engine bakah 2.4L hybrid turbo petrol te a hmang dawn a. India ram market-ah thung chuan 2.8L turbo diesel engine, 48V mild hybrid technology nena thlunzawm a hman hmel thung a. Manual leh automatic transmission pawh duhthlan turin a la awm chhunzawm zel hmel a, hengah hian 5-speed leh 6-speed transmission te duhthlan tur a awm ang.
Engpawh ni se, Fortuner thara kan beisei lawk, media report hrang hrangin an tarlan te hi a rawn keng vek dawn em tih chu a la chiang chho ang a, company atangin leh media report hrang hrang atangin kan hre chho zel turah ngai ila, Toyota SUV hlun leh rintlak Fortuner chu a chi thar, mawi leh changkang zawk kan hmu ngei dawn tih erawh a chiang a ni.