Aizawl: Mizoramah kum khatah Sangha quintal sing 5 bawr vel a thar chhuah thin a ni a, hei hi a mamawh atanga chhutin za zela 38 vel chauh a ni a; Fisheries Department chu sangha thar chhuah a pun zel theih nan a tam thei ang ber sangha dil thar siam zel a tum.
Fisheries Director Laltleipuii chuan nimin khan a pisaah chanchinbu mite kawmin Mizoramah sangha dil nei 18,519 an awm anga chhut a nih thu leh kum khata a thar chhuah chu quintal 5,298.50 a nih thu a sawi.
Director chuan, “Mi pakhatin kum khat chhungin sangha kha 11 vel ei hi a tha tawk nia mi thiamin an chhut atang chuan kan ramin a mamawh atangin kan thar chhuah chu za zela 38 vel chauh a ni,” a ti a, sangha thar tam theihna hmun, Mamit leh Kolasib lama sangha khawitu tam zawkin an thar chhuahte hnamdang an khartir thin avangin Mizorama thar chhuah ve tam zawk chu state thenawma chhuak thin tih a sawi.
Tleipuii chuan sangha thar chhuak tam tura an hmalaknate sawi bawkin, sangha chia intodelhna turin a thar chhuah lama tui leh hmunhma neite hnenah tanpuina an pe thin tih te, PMGSY hnuaiah mi 14 hnenah tanpuina an pe tawh tih sawiin, sangha no piang hlim hralh chhuah theih tiat tura vulh lenna siamna turin mi sang dawn hnenah tanpuina pek chhuah a ni tih te, sangha thar chhuah a pun zel theih nan hmun remchang apiangah a tam thei ang ber dil thar siam zel tum a nih thute a sawi.
Mizoram luidunga sanghate a rem loh nan theihtawp chhuaha hma an lak thu fisheries director chuan sawi bawkin, Mizoram Fisheries Act hnuaiah sangha man phal loh hunte siam a ni tih te, dan phal baka sangha mante chu an um zui a, dan hnuaiah hrem thin an ni tih te bakah tun hnaia social media lama lang, Mizoram chhim lam hmun pakhata bomb tam tak hmanga sangha man pawh chhui zui mek a nih thu a sawi bawk.