Health Minister Lalrinpuii chuan Mizoram hmun hrang hranga medical officer indaih lohna awm chu Zoram Medical College-a batch hmasa berte an zir zawh fel hunah phuhruk beisei a nih thu a sawi.
Nimin assembly session-a member-te zawhna chhangin health minister chuan, “Medical officer indaih lohna chu April thlaa ZMC-a zirlaite an zir zawh hunah an indaih beisei a ni,” a ti a, medical officer turin doctor-ten a nghet loa thingtlanga awm an duh loh thu te, ZMC-a zirlaite chu an zir hmaa sorkar-a intiamkamna neih an nih angin kum hnih tal Mizoram sorkar hnuaiah an thawh a ngaih tur thu te, an hlawh a tlem emaw, tlem lo emaw, thingtlang hmun hrang hrangah an dah theih tawh dawn tih a sawi.
Health minister chuan hnalak chungchang zawhna chhangin specialist post sarih hnawh khat turin MPSC-ah recruitment kalpui mek a ni a, tun hnai khan Ayush doctor panga an la thar a, offer of appointment an pe mek a, GDMO post pakua fill up turin MPSC-ah an thawn tawh a, hnalak kalpui theih thuai beisei a nih thu a sawi
Rinpuii chuan Asian Development Bank loan chungchangah sorkar hmasa a fakawm a tih thu a sawi a, tunah chuan parliament inthlanpui a awm dawn avangin June thla velah inremna ziah theih a nih tur thu a sawi a ni.