Assam-a rorel mek, BJP chuan anmahni thlawptu pakhat, Asom Gana Parishad (AGP) an chân hnuah a thlawptu dang, Bodoland People’s Front (BPF) nen Lok Sabha inthlanpui lo awm turah bial an insem fel ta a, bial 14 awmah an thawhpui party hi bial khat chantirin anni hian bial 13-ah an chuh thung ang.
An party chhunga mi pakhat chuan, “BJP hi bial 14-a bial 13-ah an ding dawn a, bial 1, Kokrajhar chu BPF-in an chuh thung ang,” tiin a sawia. Inthlan atana an inbuatsaih chhoh dan tur hi an party mi hniam ber (grassroots worker)-ten ngaihdan an thawh atangin an inbuatsaih dawn tih a sawi.
BJP hian AGP hi nikum inthlanah khan an thawhpui a; mahse, sorkar laipuiah Citizenship (Amendment) Bill pass tumna a awm lai khan duh lovin AGP hian an chhuahsan a ni.
CAB hi Assam-ah duh lohna nasa taka lantir ni mah se saffron party hian an chhiatpui lem lo tih a lang a, tun hnaiah panchayat leh Autonomous District Council inthlanah pawh an la tha hle a, hnehna an chang ve ve a ni.
Lok Sabha inthlan lo awm turah pawh a tlem berah bial 10-11 an lak theih a rinawm thu finance minister Himanta Biswa Sarma chuan Ningani khan Golaghat-ah a sawi.