Prime Minister Narendra Modi chuan sorkarin a tiam tawh angin kum 2026-ah chuan India ramah chenna in nei lo an awm tawh dawn lo tih a sawi a. “Vawiina PM Awas Yojna hmanga in la dawng lo hian naktukah chuan an dawng ngei ngei ang,” a ti.
Kanpur khawpuia nimina vantlang inkhawmah Prime Minister chuan PM Awas Yojana hnuaiah chenna in vbc 1.50 sak a ni tawh tih a sawi a. Uttar Pradesh bikah pawh he scheme hnuaiah in tam tak sak tawh niin kum 2017 nen chuan inthlau tawh tak a nih thu a sawi.
Tun hnaia Kashmiri mite beih an nih thin chungchangah Modi chuan, “Tunah hian inpumkhat, indawh leh inunau kan mamawh a. Mi thenkhatin Kashmiri unaute an lo bei a, UP sorkar hian an chungah action a la ang,” a ti a. Yogi Adityanath-a sorkar hmalak tawhna a fak bawk.
Modi hian sipaite chetna sawihnawm zawngin mi thenkhat an tawng chu vanduaithlak a tih thu a sawi a. “Hetianga kan sipaite laka rawng taka tawngkam hman hi firfiakte chawivawngna mai a ni,” a ti.
Mi nuai khat chuang hmaa thu a sawinaah hian Prime Minister chuan sorkar chu firfiakte lakah na zawkin a che zel dawn tih a sawi bawk.