Kolasib District Hub for Empowerment of Women (DHEW), District Programme Officer (Women & Child Development) office-in nimin khan Kolasib-ah khawvel huap Hmeichhiate Ni’ (International Women’s Day) an hmang a. Thingdawl RD Block-a Block Development Officer F. Lalnisai’n a hmanpui.
BDO Thingdawl F. Lalnisai chuan sawrkarin hmeichhiate ngaipawimawhin an hamṭhatna tur ruahmanna tam tak a siam bakah, dan hnuaiah an dikna chanvo a humhalhsak tlat tih sawiin, hmeichhia ten mahni dikna leh chanvo hriat chian a pawimawh thu a sawi a. Rural Development department-in nuho pawimawhna hriaa self help group (SHG) a din kaltlangin hmasawnna hna tam tak thawh a nih thu pawh sawiin, RD hmalaknaah chuan nuho chakna khua apiangah hmasawnna a kal chak niin a sawi.
Zirna, hnathawhna leh ram rorelnaa Mizo hmeichhia ten hma an sawn zel chu lawmawm a tih thu sawiin, dinhmun sang leh pawimawh chelh zel thei tura theihtawp chhuah a pawimawh thu a sawi a. Fa te zirna kawngah nute ṭawngkamin awmze thui tak a neih theih avangin mahni fate thlawp leh fuih ṭhat a pawimawh thu a sawi.
Hmeichhe dinhmun chawisan nan hmeichhia leh hmeichhia inngaihsan thiama, zahawmna inhumtawnsak a ngai tih sawiin, nuho kalkhawm chu ram hmasawnna ruhrel din kawnga an pawimawhna hriaa, tel ve leh ti thei ve an nih inhre tur leh an theihna tipung zel turin Thibngdawl BDO chuan a chah a ni.
District Programme Officer Lalthlengkimi’n he hun hi a kaihruai a. Kolasib Sub-Headquarters MHIP Vice President Laltluangi’n hunserh a hmang a. DHEW-a Specialist in Financial Literacy Zonunpuii’n Mission Shakti hnuaia hmalakna hrang hrang leh hmeichhiate dikna humhalhna dan te a sawi a. Kalkhawm ten intluktlanna khawvel siam tur leh inthliar hranna awm ṭhin veng tur te, hmeichhiate dikna leh chanvo humhalhsak tur tein thu an tiam bawk.
Kolasib-a International Women’s Day puala “Khawtlang leh nunphung siamṭhat kawnga hmeichhiate chanvo” tih thupui hmanga thu tawi inziahsiak buatsaihah mi 22-in thuziak an thehlut a. Pakhatna John Thlamuana Pautu, Kolasib Ṭumpui, pahnihna Kimtei Vanchhawng, Kolasib, Ṭumpui leh pathumna Lalrammawia, Kolasib Hmarveng te an ni.