Aizawl : Mizoram Pradesh Youth Congress Committee (MPYCC) leh Mizoram Pradesh Mahila Congress Committee chuan nimin khan MPYCC Office-ah International Women’s Day 2024 hun an hmang a, tun hnaia Mizo hmeichhe huaisen leh chhuanawm tak, Delhi khawlaia misual zurui silai nena inhrosa, kutlawnga silai chhuhsaktu PC Vanlalruati, Delhi Police chawimawina an hlan.
Inkhawm kaihruaitu MPYCC Sr. Vice President Ngurdingpuia Pachuau chuan, Mizo hmeichhe tam tak chawimawi tur an awm rualin, India ram pum anga Mizote tihmingthatu PC Vanlalruati hian chawimawi a phu a ni, a ti.
PC Vanlalruati a awm loh avangin a aiawhin a chhungten chawimawina an dawng. A chhungte hian PC Vanlalruati chanchin tlangpui an sawi nghal.
He hun hmanpuitu Vanlalawmpuii Chawngthu, ex-Minister leh Mahila Hqrs. President ni bawk pawhin thu a sawi bawk.
Delhi Police-a tang mek PC Vanlalruati hian March 1, 2024 zan khan Hauz Khaz Village, Delhi-ah mi rikraptu mipa pakhat chu pawmchilhin a pistol a chhuhsak a. Pistol a laksak hnu hian mi rikraptu hi mipuiin kut an thlak a, mipui lak atanga misual hi a chhan chhuah leh hnuah jail-ah hruai a ni. Pistol-ah hian a mu pathum a lo la awm a ni.