Labour, Employment, Skill Development & Entrepreneurship (LESDE) Minister Lalnghinglova Hmar chuan Mizo thalaite khawvel ram zau zawka hna an thawh theihna turin hma an la dawn tih house a hrilh.
Nimin assembly session-ah member-te zawhna chhangin LESDE minister chuan ram pawna hnathawk tura Mizo thalaite tirh chhuahna turah an dinhmun a him theih nan department-in hma a la tih sawi bawkin home department-ah pawh an thlen tawh a, dan hnuaiah engkim kalpui an tum niin a sawi.
Tetea Hmar chuan jail tangte leh home-a awmte an thiam thil zirtirna tur sum awm theite an dap a, sorkar laipui lam pawh an dawr tawh a, a hnuah department hotute nen an dawr leh tih sawiin Rs. vbc 31 chuang a awm thei hnai dawn tih te, hei hi hmun hrang hranga thalaite tan thiam thil zirna turin an hmang dawn niin a sawi.
LESDE minister chhan tura member-ten zawhna an zawhnaah hian ITI leh polytechnic building sak chungchangte pawh a tel a, hemiah hian House Leader Lalduhoma, Chief Minister chuan sawi belhin sorkar laipui suma polytechnic leh ITI building sak chu sorkar hmasain kalpui a, hna zawh loh a tam a, sorkar hmasa lamah PAC chairman a nih ve laiin an tlawh chhuak deuh vek a, department hotute an kamkhat a, contractor-te an hau a, an ti nasa viau a; mahse, sorkar atanga will power a awm loh chuan thil tih a sawt lo a, PAC recommendation a sawt lo niin a sawi a, tunah hian engtin nge an tih dawn, an endik leh ang a, contractor an bân mai dawn em ni tih chu enzui a ngai niin a sawi.