Mizoram Board of School Education (MBSE) hnuaia pawl 10 exam neih meka zawhna siam danah thil fel tawk lo awm anga sawi awm chu chhui chian a ni dawn a, thil ti dik lo an awm a nih chuan action lak a ni dawn tih Education Minister in a sawi.
Zawhna chhangin Education Minister Dr. Vanlalthlana chuan High School Leaving Certificate (HSLC) board exam neih mekah Social Studies (SS) leh subject dangah question pattern felhlel awm leh question hre lawk an awm anga sawi chu sorkarin a ngai thu tak hle a, hemi chungchangah hian inrinni khan thutkhawm hmanhmawh an nei a, thil dik lo a awm em tih an chhui zui nghal a, ti dik lo a awm an nih chuan an chungah action kan la ang, a ti.
Education minister chuan, zirlai zingah zawhna hre lawk an awm nia sawi awm chungchang chu a dik reng em tihte, zawhna chu eng chin nge a lo darh tawh tihte pawh chhui chian a ngai dawn tih a sawi a, hemi chungchangah hian thil dik lo deuh chu a awm niin an hria a, hetihlai hian chiangkuang zawkin chhui chian phawt a tul tih leh an en liam mai dawn lo tih a sawi.
Hemi chungchangah hian Mizo Zirlai Pawl (MZP) pawhin thuchhuah siamin, HSLC exama SS leh subject danga zawhna siam dan felhlel awm leh zawhna hre lawk an awm anga sawi tur awm chu tha lo an ti tak zet tih sawiin, zirlai naupang rilru thianghlim ten zirna kawnga inelna thianghlim an neih mek laia, an rilru tihnual thei hetiang thil thleng hi chhui chhuaka, hmala vat turin MBSE hotute an ngen tih an sawi a, MZP in zirlaite thlavang a hauh zel dawn a, MBSE hmalakna pawh ngun takin an en zui zel dawn tih an thuchhuahah chuan an tarlang bawk.
MSU pawhin inrinni chawhnu khan MBSE Chairman JH Zoremthanga kawmin thil awmzia an sawi pui a, hetiang thil hi tun hma pawhin ngaih bel theih tura school thenkhat atanga syllabus inpek fuh bik riau a thlen thin tawh thu leh hetiang thil avanga admission thlenga nghawng thei thin a nih thu chairman chu hrilhin, zirna quality leh Zirlaite moral ti chhe thei a nih avangin uluk taka chhui chiang tur leh inquiry la a, hrem ngai an awm anih pawhin dan anga hrem ngei turin an ngen a ni.
MBSE Chairman JH Zoremthanga pawhin thil fel tawk lo nia ngaih theiha thuthang chungchang hi dan anga hmalak anih theih nan inrawn khawmna neih tum a nih thu sawiin, he thil thleng hi an ngaih serious thu leh thil diklo a awm chuan action lak ngei a nih tur thu a sawi bawk a ni.