Inrinni zing khan Saudi Arabia-ah inhnek ngaihven hlawh tak a awm a, Riyadh ah Anthony Joshua leh Francis Ngannou te an inhnek. Champion hlui Anthony Joshua lakah UFC champion hlui Ngannou a mualpho a, round hnihna lekah knockout hmangin a tlawm.
Boxing-ah palian huanga champion hlui Anthony Joshua-a’n a Oleksandr Usyk lamah a tlawm zawn a, kawnghren a hloh hnun a insiam tha a, champion phuin a inlan leh mek. Champion nawn leh ngei tuma inlan a nih vangin UFC champion hlui Ngannou a hmachhawn tur hian ngaihven a hlawh. Cameroon fighter Ngannou hi palian champion Tyson Fury hnek tlu hial thei a nih vangin boxing ah a hming a chher lian a, ngaihven a hlawh hle. Joshua lakah a chak a nih chuan Ngannou hian title fight a hmachhawn zui theih hial beisei a ni.
Inhnek ngaihven hlawh takah boxing a champion hlui Anthony Joshua-a’n UFC palian champion hlui Francis Ngannou lakah bul a tan tha viau a, inhnek tantirh atangin a khingpui a thunun nghal. Joshua hian round khatna tawp dawn lamah a khingpui a hnek tlu phawt. Tlu hma leh mah se Ngannou a tho leh a, round khatnaah tlawm a pumpelh phawt rih.
Round hnihnaah Joshua a khel tha leh zual a, an chak zui ta hial. Joshua hnek na tak tuar lovin Ngannou a tlu. A tlawm mai rin a nih laiin Ngannou a tho leh a, inhnek a hmachhawn zui leh. Tho leh mah se a ding rei thei tawh lo. Joshua hian chiang fahranin a hnek fuh leh siah a, thochhuak tur awm lek lovin Ngannou a tlu zui hnawk a, inhnek a tawp zui nghal. Inhnek ngaihven hlawh chu beisei aia hmain a tawp a, Anthony Joshua lakah Francis Ngannou a mualpho zui ta a ni.
Tarlan tawh angin British boxer lar Anthony Joshua hian Ukranian boxer Olekdandr Usyk lakah a kawng hren a hloh a. Usyk nen hian inhnek nawn leh mah se tlawm zawkah an tang nawn leh. Usyk lakah a tlawm zawn hnuin inhnek vawi hnih a hmachhawnna niin a chak ve ve a, champion nawn leh turin a inpeih leh viau tawh.
Anthony Joshua lakah mualpho mah se Francis Ngannou chuan boxing chawlhsan ngawt a tum loh thu a sawi a, “Boxing ah hian ka hna ka la hlen lo. MMA-ah let leh pawh ni ila boxing khel zuiin, hnehna ka la chang ngei ang”, a ti. Cemeroon boxer Ngannou hian UFC a kalsan hnuin boxing a luh chilh a, palian huanga boxer tha ber Tyso Fury a hmachhawn a. Fury lakah beisei phak baka thain a inlan. Fury lakah a khelh that vangin boxing-ah a hming a chher zui a, palian champion hlui Joshua a hmachhawn theih phah. Professional boxing vawi hnih khelin, tlawm zawn bawk mah se a hausakna erawh a pung chak hle thung.
Francis Ngannou hian UFC a chawlhsan hnuin Pofessional Fighters League (PFL) hmachhawn turin a hming a pe zui a. PFL ah la inlan lo mah se a khingpui tur erawh a chiang tawh a, palian champion Renan Ferreira nen kumin kum tawp lamah an inhmachhawn tura ngaih a ni.