Fifa Santosh Trophy 2023-24 chu March 9, Inrinni zan khan khelh zawh a ni a. Final hmuhnawm takah Services in 1-0 in Goa an hneh a, a vawi sarihnan an champion.
Golden Jubilee Stadium, Yupia a final hmuhnawm takah Services leh Goa te an inhnehtawk hle. Anni pahnih hi group A-ah awm dunin, an lo inhmachhawn tawh a, Goa in hnehna an chang. Group stage-ah chak zawk an lo nih tawh vangin Goa hi champion tura rinkai zawk an ni. Champion tura rinkai zawk niin, final-ah khel tha viau mah se an vanneih ni a ni lova, tawm zawkah an tang ta thung. Goa laka Services chakna goal hi minute 67-naa Shafeel P.P. thun a ni a. Hla tak atanga goal a thun hmangin sipai team tha Services hi Santosh Trophy-ah a vawi sarih nan an champion. Champion thar Services hi semi-final ah Mizoram laka vannei ta te kha an ni.
Kum 1941 atanga khelh tan Santosh Trophy-ah hian West Bengal an champion ngung ber a, vawi 32 an champion tawh. Champion ngun ber dawttu chu vawi riat champion tawh Punjab an ni a, champion thar Services hi champion tam lamah pathumna a ni thar. Hetihlai hian Mizoram chu a vawi khat nan kum 2014 khan an champion a, hemi hnu hian final an la lut leh lo.