- Ruata
Tunhnaiah India rama SUV hlun leh hralh tam tak ni thin, tunhnaia Ford in India ram an chhuahsan tak avanga a thar lei theih tak loh Ford Endeavour thar, khawvel hmundanga kan hmuh ang leh Toyota Hilux te elpui Ford Ranger chu India ram kawngpuiah ngei hmuh a ni a. Heng Ford lirthei pahnih hi internet lamah chuan a lar nghal hle a ni.
Heti a nih chuan Ford hian India rama rawn lut nawn tur hian hma a la nasa viau tawh tih a hriat ruak mai a. Chennai khawpui daifemah Ford Ranger leh Endeavour (hmundangah chuan Everest tia hralhchhuah) hi truck in a phur lai hmuh a ni a. Hei mai bakah hian kawngpuia a tlan tlai ngei pawh hmuhtur a awm zui chho zel a. India ramin a la thlakhlelh em em SUV tha leh chak tha, mawi bawk si Endeavour chu kan hmu leh thuai dawn niin a lang a ni.
Tunhnaiah lifestyle pick up truck huangah Toyota truck lar, Hilux chuan India ram a luah hneh hle mai a. Khawvel hmundanga a elpui leh kawng emaw chenah chuan a thil neih pawh inrualkhai tak, a man thuah pawh inhnaih tak Ford Ranger hi kan lo hre tawh thin a. India rama tihchhuah a la ni ngai lo a, Ford Ranger mawi ti tute chuan an chilthli tla duah duahin an lo ral thlir ve mai mai a thin tih theih.
Hetiang a nih laia India kawngpui ngei maia kan han hmu ta thut hi lifestyle pick up huang lirthei ngainatu leh lei tuma lo intintuah mek te chu a ti phu zawkin a rinawm a. He lirthei huang duhthlan tur tam lohna – Hilux leh Isuzu D Max te chauh duhthlan tur awm rihna chu a rawn ti phuisui dawn hlein a hriat a. Endeavour tluk zetin Ranger pawh hi India ramah a ‘hit’ ngei a rinawm a ni.
Everest/Endeavour kan hmuh hi India rama an hralhchhuah thin ang design aia thar kha a ni leh tawh a. Tuna khawvel hmundang market-a kan hmuh ang design mawi tak a ni a. A hma bawr hi chu Ranger nen hian a inang viau a ni. Endeavour thar tur hi a mawiin a elpui ber Fortuner nena khaikhin pawhin khawi nge mawi zawk tihah chuan inhnial theih tak tur a ni a. A hmasa khan Fortuner thar, design thar nen a chhuak dawn tih kan lo tarlang tawh bawk a. An inel chho leh bap bap turah a ngaih theih awm e.
Hetihrual hian heng Ford lirthei thar pahnih hi India ramah tihchhuah a ni ve ve dawn em tih te, tichhuak dawn ta se engtikah nge ni ang tih lam chu company atang pawhin official-a thu puanzar a la awm miah lo a. Hei mai bakah hian media hrang hrang te pawhin an la sawi chiang ngam lo viau a ni.
Engpawh ni se, Ford hian tunhnaiah Endeavour thar ‘patent’ chu an lo dil tawh a. India rama bu khuar leh tur hian hma an la mek tih erawh a hriat a. Heng an lirthei man to ho mai bakah hian electric lirthei man to lutuk lo lamah pawh hma an la mek bawk a ni.
Ford in India a chhuahsan khan Mizorama an lirthei lei tam mawi tak tak Figo, Ecosport, Endeavour leh adangte hi a la tharin a la tha hlawm si a. Tunah pawh hian mawi leh tha takin kan kawngpuiah pawh hmuh tur an la awm a. He company changkang Ford lirthei ngainatu leh nei mek te tan pawh hian thu lawmawm a awm chhoh zel a beiseiawm a ni.