NBA regular season khelh chhunzawm zel a ni a, Luka Doncic record kan hmuh hnuin Anthony Davis record hmuh tur a awm chhunzawm ve leh nghal. Los Angeles Lakers in Minnesota Timberwolves an hneh tumin Davis hian record thar a siam. Inkhel dangah vawi hnih an tlawm zawn hnuin Milwuakee Bucks in hnehna an chang.
LA Lakers hian Timberwolves lakah bul an tan tha a, quarter khatnaah point liin an chungnung. Bul tan tha lo mah se quarter hnihnaah Minnesota Timberwolves an khel tha a, point thumin an chungnung ve thung.
Chawlhlawk hnu lamah inkhel a hmuhnawm vui viau a, quarter thumnaah point hnihin Timberwolves an chungnung zui leh a, point khata hmahruai chungin quarter hnuhnung ber an hmachhawn. Qarter hnuhnung berah chak ngei tumin an innawr tawn nasa hle a, point an inluh chhawk zak zak hnuin Lakers hi point 12 zetin an chungnung ta a. Point 11 in an khingpuite an lehthal a, hnehna pawimawh tak an chang.
Point 120-109 a Minnesota Timberwolves an hneh tum hian LA Lakers player pawimawh Anthony Davis chuan point 27 a tawhchhuah bakah ball sawhlet vawi 25 zet a dawng tling bawk. Hei mai a la ni lo, Davis hian assist vawi 5 a neih bakah steal vawi nga neiin bloc vawithum an nei tling cheu bawk a. NBA game khatah heiang hnuhma ropui hnutchhiah thei hmasa ber niin, record thar duhawm tak a siam. LA Lakers tan hian LeBron James chuan point 29 a thakchhuak ve bawk.
Inkhel dangah Eastern Conference-ah pahnihnaa awm mek Milwaukee Bucks chuan vawi hnih an tlawm zawn hnuin hnehna an chang ve leh ta a. An khingpui Los Angeles Clippers chu point 124-117 in an hneh.
Bucks tan hian Damian Lillard chuan point 35 a thawkchhuak a, Giannis Antetokounmpo chuan point 34 a thawkchhuak ve bawk.