Home minister K Sapdanga’n ram pawna hnathawk tur thawn chhuak thin private placement agency te’n DC atanga license an neih te an hmang sual thin a, an tih theih chin mumal tak duan fel thuai an beisei tih house a hrilh.
Nimin Assembly session-a zawhna chhangin Home minister chuan, Mizorama private placement agency te’n district Deputy Commissioner atanga license an hmuh chu an hmang sual thin nia an hriat thu a sawi.
DC-in license a pek ah hian India ram chhung china hnathawk tura in thawn chhuak tura phalna a nih laiin Agency lam erawhin license-a in ziak ‘Outside Mizoram’ tih chu an duh dana lo siam rem ve maii ‘Singapore te pawh Mizoram pawn alawm’ tiin hma an lo mai thin niin a sawi a, DC-in license a pek chhuah ah hian terms & Condition a la mumal loh thute, hemi chungchang hi an sawi ho tawh a, Agnecy te tih theih chin chu an peih fel thuai an beisei tih a sawi.
Mizoram ramria Police te duty post chungchang zawhna chhang bawkin Home minister chuan, ramria Border Outposts (BOP) leh Police hmunhma dangte chu a phuisui lo hlawm tle tih a sawi a, hetihlai hian heng hmuna duty Police te chu an felin nuam ti lo ang pawhin an awm lo tih a sawi a, department-in oup post leh BOP te ti changtlung turin a theih ang angin hma a la dawn tih a sawi.
Home minister Sapa chuan, Armed Police te’n rifle allowance an dawn thin thu tun hnaiah an tih san thu sawi bawkin, rifle allowance-a Rs 40 an dawn thin chu a letin tih pun phawt ni rawh se tiin thutlukna siam thar ani a, Rs 80 ah hlan kai a ni, a ti bawk.