School Education minister Dr Vanlalthlana’n Mizoram Board of School Education (MBSE) hnuaia pawl 10 exam neih mekah dik hlel taka zirlaite hnena Social Science subject-a suggestion zawhna lo petu zirtitu chu a hna atanga chawlh lai lawk tir nghal a nih thu a sawi.
Nimina Assembly budget session-ah Education minister chuan official statement siamin HSLC exama neih meka SS Subject-a zawhna sawisel kai chungchanga an hmalakna hi a sawifiah a, Govt. Mizo High School zirtirtu pakhatin a zirlaite hnena SS subject-a suggestion a pek chu Board exam zawhna nen a inang deuh vek tih social mediaah a darh tih an hriat veleh MBSE hotuten hma an la nghal tih a sawi.
Hemi chungchangah hian MBSE chuan MISSTA President, Govt. Mizo High School Headmaster leh zirtirtu inhnamhnawih ni-a rin chu ko nghalin, thu zawh fiah a nih thu sawiin, zirlai naupangte pawh thu zawh fiah leh niin Govt. Mizo High School zirtirtu hian suggestion chu a lo pe ngei a ni tih finfiah a ni ta tih a sawi a, he zirtirtu hian naupang zirnaa chak lo bik deuh thenkhat, a hrana zirtirna (special class) neihpuiin, suggestion darh chhuak ta chu pein, zirlaite hian an lo ziak thla hlawm a, zirlai ten an lehkhabuah suggestion an lo ziah thlak pawh evidence atan kawl that a nih thu a sawi.
Education minister chuan, an chhui chiannaah Social Science subject suggestion chu nasa taka darh a ni lo hlauh tih an hriat thuute, a chhuahna school naupang pawhin an nei vek lo tih an hria a, zirlai thenkhat, special class kal tura tih hi an kal vek lo va, a kalte pawh hian an lo ziak thla vek lem lo tih te pawh hriat a ni ta zel tih a sawi.
Hetiang thil dik lo lakah hian sorkar thikthu a chhiat thu sawiin, dikhlel taka SS subject a suggestion petu zirtirtu hian sorkar dan a zawm loh avangin a chungah action la in, march ni 10 khan a hna atanga chawlh lailawk tir (suspend) nghal a nih thu leh hemi ni vek hian MBSE lam pawhin Police Station ah FIR an theh lut nghal tih a sawi.
Dr Mathlantea chuan, suggestion petu ngei pawh hian hetianga boruak awm leh mite ngaihven a ni dawn tih hria se la chuan a tih an ring hauh lo a, zirlai naupang suggestion lo dawngtute chu an dem lo a, chhui zuia um zui zel pawh an tum lo tih a sawi a, zirtirtu sang chuang karah zirlaite hnena zawhna lo sawi chhuaktu mi pakhat hian zirtirtu dangte nihna a tarlang lo tih chu mipui te’n hria se an duh thute, hetianga zirtirtute zahawmna tihmelhemtu lakah hian dan ang taka hma lak an tum a, hun dangah pawh khauh takin hma an la zel dawn tih a sawi a, a zirtirtu pui, rilru na tak tak an awm tih an hria a, an khawngaih tak zet tih a sawi bawk.