- Lalnuntawma Fanai
Pawlkût thla ni 17, 2024 (Nilaini) tlai lam khan, Chief Minister Pu Lalduhoma chuan Zokhawsanga Assam Rifles awmna tur a tlawh a, “State sorkarin Zokhawsangah hian tihtur a nei a, chungte chu tih zawh a nih hunah AR te insawn chungchang hi ngaihtuah a ni ang. Tui leh power supply pawh an mamawh ang pek a la ni lo,” tiin a sawi a (Vanglaini 18th, Jan 2024). MNF sorkar liamta thu nen a inkalh avangin, RTI Act hmangin Home Deptt, PWD leh PHE-ah ka zâwt zui a, tuna CM Pu Lalduhoma thu nen erawh hian a inmil lo chiang hle!
Chhui zui hmasa ila. Khuangchawi thla ni 4, 2022 (Nilaini) khan Chief Minister Pu Zoramthanga hovin Zokhawsanga AR awmna hawng turin Union Home Minister Amit Shah chu sawm a ni a, April ni 1, 2023 ah AR Batallion Headquarters, Zokhawsang – cheng vbc 163.237 chu lammualah a hawng zui ta a. Chief Minister Pu Zoramthanga pawhin, Union Home Minister ngeiin Assam Rifles Headquarters thar a hawng chu lawmawm a tih thu leh Mizo mipuite tan ni chhinchhiah tlâk tak a nih thu a sawi a nih kha.
CM thar Pu Lalduhoma thu leh sorkar liamta thu a inan loh tâk nuai avâng hian, Ramtuk thla ni 16, 2024 khan, Home Department leh PWD-ah online hmangin RTI zawhna ka thawn ta a, hemi thla vêk ni 23, 2024 khan PWD-ah online bawkin zawhna ka thawn bawk. Home Department-in RTI zawhna min chhannaah chuan, “Mizoram sorkarin Zokhawsang a AR te insawnna turah a tihtur tih loh a nei lo,” tih a ni a, “Zokhawsang a AR te insawnna turah Mizoram sorkarin a tihtura a ngaih a tih zawh tawhte chu –
- Ram pek chungchang : Zokhawsang a AR te insawnna atan Mizoram sorkarin DIG, AR, Mizoram Range hnenah ram a pe.
2 Power Supply chungchang : Zokhawsang a AR te awmna tura an mamawh power supply tihfel a ni tawh a, Superintendent Engineer, P&E, Aizawl Power Circle in ziakin dt 13.05.2019 khan commander Hqrs 23 Sector, Assam Rifle hnenah hemi thu hi a thlen.
- Water Supply chungchang : Zokhawsang a AR te tui mamawh pêkna atan PHED lamin an tihtur an ti zo tawh a, Executive Engineer PHED Aizawl Water Distribution Division leh Commandant, 26 Assam Rifles ten dt 1.03.2012 khan ziakin an inhlan fel tawh a ni. Zawhnaah hian, a kimchanga hriat ka duh thu ka ziak tel a, Home Department a SPIO hian, “Zawhna no 1&2 na a a kimchang erawh hi chu Section 8 (1) (a) of RTI Act 2025 leh section 24 of RTI Act 2005 behchhana siam 2nd schedule a Sl. No 14 ah Assam Rifles hi tarlan a nih avângin pêk chhuah hi a rem lo a ni,” tiin a rawn chhâng a ni. RTI dân hi langtlang sorkar siamna tura siam ni mahse, sorkar inrelbawlna zawng zawng hi a leng vek lo tihna a nih chu.
Ramtuk thla ni 28, 2024 khan PHE department SPIO pawhin chhanna an rawn thawn a, “Zokhawsang a AR te insawnna turah, Mizoram sorkar hnuaia PHE Department chuan a tihtur a tifel vek tawh a, la tih loh a nei lo,” tiin an rawn chhâng a. PHE in hma a lo lak tawh dan chu hetiang hi a ni.
- Assam Rifles Zokhawsang tâna tui pêkna (Assam Rifles Zokhawsang Water Supply Scheme) hi kum 2012-ah thawk zovin, 16th March 2012-ah PHE Department leh 23rd Sector Assam Rifles, Khatla Aizawlte chuan agreement sign a ni a, Assam Rifles kutah hlan fel nghal a ni.
- Heng a hnuaia tarlan hna hrang hrang an mamawh tura chhûtte hi thawh zawh a ni.
i) RCC Reservoir : 4,00,000 litre capacity – 1 no
ii) RCC Reservoir : 1,00,000 litre capacity – 1 no
iii) Pump House and Chowkider Quarter – one storey (ground floor for Pumphouse and first floor for Chowkider Quarter – 57.6 sgm)
iv) Transformer – 63 KVA, 11/0.4 Kv 3- phase, Make – Transline UDYOG
v) Pumping Main – Size :80mm diameter, Total Length = 2800 metre
vi) Feeding Main from Zemabawk to main RCC reservoir within Assam Rifles land : 150mm dia, total length – 707 meter
vii) Pumps, Machineries and Equipments :
a) Pumps – 18.5KW – 2 sets
b) Diesel Engine – 30 HP – 1 no
c) Electric Motor – 18.5 KW – 2 sets
d) Control Panel – – 2 sets
Pawlkût thla ni 17, 2024 (Nilaini) a Chief Minister Pu Lalduhoma tlai lam Zokhawsang va kal hian, sorkar hmasain Union Home Minister Amit Shah a hawntir hial tawhah hian, sorkar la tih loh a va hmu thar ta thut nge, hetianga a rawn sawi tâk avâng hian, “State sorkarin Zokhawsangah hian tihtur a nei,” a la tih hi hriat chian lehzual a châkawm ta hle! Sorkar hmasa khan, project lian tham dangah thil fel chiah lo hawn an nei tihte a ri ve fo si nen (Assembly Session-ah PHE Minister Prof Lalnilawma chuan, ‘Greater Water Supply Scheme Phase III zawhfel a nih hmaa hawn a nih thu a sawi,’- Bengvarna 23.2.’24).
Sorkar hmasain Zokhawsang pawh zo tawha an insawi hi, zo chiang loin Union Minister an hawntir nge? Chutih rualin, RTI chhanna en hi chuan, Chief Minister Pu Lalduhoma thusawi hi a mak angreng ta hle! He thilah hian CM hian a sorkara a official te a rawn ik em? RTI chhanna en hian a sorkar hnuaia official te a rawn lo tih a lang kuau bawk si! Kil khatah Assam Rifles te thu leh hla ringawt lain, thu a rawn puang pawp tihna em ni? ZPM sorkara hotupa ber hian a sorkara official te rawn loa thil a sawi mai hi, a mawng hlim tihna a ang ta ber a. MNF sorkar kal tawh thil tih dah hniam nan leh AR te rilru tino lehzual turin thupuan a va nei ta tihna a ni em tih hi zawhna hraw zet a piang ta a ni!
Pawlkût thla ni 17, 2024 (Nilaini) tlaia Chief Minister Pu Lalduhoma va kal hun leh RTI zawhna chhan hun, a chung tarlan inkarah hian, ZPM sorkar thar hian Zokhawsangah hma thar engmah a la la chuang lo tih hi ka hriat dan a ni a, he zawhna luh hmaa sorkarin thil an lo tih fel vek tawh thu hi RTI chhannaah hian kan hmu tihna a ni ber.
Zokhawsang a AR-te insawnna turah RTI dan hmanga zawhna chhanna leh MNF sorkar kal ta thil tih nge dik zâwk? ZPM sorkara Chief Minister thu sawi hi? Kan Lal Isua ṭawngkam khat pawh amah ringtute tan damna a nih laiin, ram hruaitupa ber ṭawngkam khat lek pawh kan tan buaina a tling leh ta a nih ber hi!