Thawhlehni chhun dar 12 khan MZP General Headquarters, Adviser & Extended OB Meeting an thukhawm a, India Citizenship (Amendment) Rules, 2024 thawhtannia tihchhuah chungchang leh Aizawl Municipal Coorporation (AMC) hnuaia hnalak dan dik lo chungchang an rel. Meeting hi MZP President H. Lalthianghlima’n a kaihruai a ni.
Meeting chuan Aizawl Municipal Coorporation (AMC) hnuaia Geologist-3 leh Urban Animal Husbandry & Veterinary Officer, Junior Engineer leh Asst Account Officer pakhat theuh lak danah dan kalha thiltih a awm ngeiin a hria a. Mimal induhsakna uchuak tak nena heng hna pawimawh tak hi lak ngei nia hriain; dan angin Advertisment chhuah a nih loh bakah, State sawrkar phalna an lak hriat a ni bawk lova, danin a sawi angin MPSC emaw MSSSB kaltlanga lak a ni lo bawk. Chuvangin, heng hnalak dan dik lo hi MZP chuan tun kar chhung (March ni 15) ral hma ngeia sut turin AMC hotute a ngen a ni.
MZP chuan, sawrkar hna lakah a thiam leh tlingte chauh lak zel a duh a. Mimal induhsakna hmanga hnalak hi kalpui tawh lo turin mitinte a ngen nawn bawk.
MZP te chuan Citizenship (Amendment) Rules 2024, 11 March, 2024 a tihchhuah chu North East Students’ Organisation (NESO)-in tunhma atanga a dodal tawh a nih avangin, North East State tinah a order copy hal tura tih a nih angin Citizenship (Amendment) Rules 2024 copy chu MZP pisapui kawtah a hal a ni bawk a, Order copy halnaah hian North East Students’ Organisation (NESO) Vice Chairman Rikcy Lalbiakmawia leh MZP hruaitute an tel a ni.