- Mahmuaka Chhakchhuak
Hmanni lawkah Professor Darchhawna kan chan tawh a, tunah a hmingpui K. Darchhawna kan chan leh a, a pawi ngawt mai. Pu K. Darchhawna hi Lunglei Pukpui-a awm a niin ‘YMA Darchhawna’ tiin emaw “Pukpui Darchhawna’ tiin emaw kan hre lar berin a rinawm.
Pu K. Darchhawna hi chanchin ngah tak leh kawng hrang hranga inhmang mi a niin pawl hrang hrang (NGO hrang hrang) ah hian tel lohna pawh a nei lo hial awm e tih turin khawtlang rawngbawlna kawngah a inhmang nasa thin hle. Kum 1947 ah Pukpuiah piangin an unau hi hmeichhia pakhat leh mipa pakua an ni a, amah hi upa lama pathumna a ni a. An unau hi ‘Dar’ hming chawi veka phuah an ni a, hei hi a pute (a nu pa) kha hla phuah thiam Pi Hmuaki dar huai rochungtu an nih vang a ni. An naupang ber Darlawma hi tunah Pukpui VCP ni mekin kohhran rawngbawlnaah pawh inhmang tak a ni a. An unau hian danglamna tak an neih pakhat chu thlakipin unaua inhmuhkhawm hun an nei thin a, chu hunah chuan insawisel ngai an awm chuan an insawisel thin a, an zinga pakhat chuan zu a in thin avangin an chilh rawn hrep thin a ni awm e.
Pu Darchhawna hi zirna lamah chuan pawl riat thleng chauh a kal nain a thluak erawh a tha kher mai a, pianpui BA kan tih ang chi neiin thu leh hlaah pawh sulhnu engemawzat a nei bawk. Rambuai avangin Pukpui atangin Zobawkah an insawn a, kum 1969 atanga 1976 chhung an awmin Zobawkah hian khaw hrang hrang pasarih lai infinkhawmte chuan YMA din a ni a, chutah chuan Secretary hmasa ber niin hei hi khawtlang rawngbawlnaa mawhphurhna a chelh hmasak berna a ni awm e. Zobawkah bawk hian Mizo Cultural Association (MCA) dinin hun rei tak chhung Vice President mawhphurhna a chelh bawk. Kum 1976-ah Zobawk atangin Pukpui lamah an let a, chutah pawh chuan Branch YMA Secretary bawk a ni lehin kum sawm chuang lai OB-ah a awm nghe nghe. Heng bakah hian Sub. Hqtr YMA Lungleiah pawh kum 1976 atanga 2016 thleng khan chawl loin Executive Committee Member a ni char char a, chawimawina pawh a dawng nghe nghe. Sub. Hqtr YMA Conference chauh niloin CYMA General Conference pawh a kal tha hle a, kum 1977 – 2016 chhung khan tum hnih: Zawlnuam leh Khawzawlah khan a kal lo a, a bak chu a kal kim vek a ni.
Sawi tawh angin khawtlang rawngbawlna hrang hrangah hian mawhphurhna a chelh kual duah a, Lunglei District Consumer Association, Lunglei District Football Association, ZORO Sub. Hqtrs, Zofa Global Network, Mizoram Environment & Forest Consultative Forum (MEFCOF), Mizo Academy of Letters leh Chhimbial chhantuahte hian a kul a taiah a tang thei zel mai a, mi danglam tak zawng a ni. Amah hi chuan talent a neih ropui tehchiam sawi tur a tam lo nain hla hi 30 vel a phuah tawh a, Article pawh hetiang zah vel bawk hi a ziak tawh bawk. A hla phuah pakhat ‘Chhinlung Naufa’ tih phei hi chu Khampat Bungpui Award a dawng phahna a niin ‘Chhaktiangah Ral a hrang’ tih a hlaphuah pawh hi Zofate inpumkhatna lam hla niin Youtube lamah thlirtu an thahnem tawh hle. Amah hi Zofate inpumkhatna atana thawhhlawk tak a niin famta, R. Vanlawma ang maia Zo hnahthlakte inpumkhatna atana ngaihtuahna seng reng a nih avang hian ‘Chhim lam R. Vanlawma’ tih hial tur a ni.
A chanchin sawi a, sawi hmaih hauh loh tur pakhat chu Darkhuangtlang chanchin hi a hre bertu a niin a rinawm a, Darkhuangtlanga ruhro laihchhuahah phei kha chuan DDK lam pawhin amah hi an kawm hial a nih kha. Pu K. Darchhawna ka chhuanna ber chu Zofate inpumkhatna tura ngaihtuahna a hman thinna hi a ni. Chhak lamah Myanmar a buai a, a vei em em a, Mizoram lama rawn raltlante ngei pawh a ngaihtuah viau thin bawk. Lunglei lamah phei chuan Steering Committee din hial a niin chutah chuan a phusa berah a tang a, raltlan tana hmun buatsaih pawh vawi duailo a tlawhin ei tur leh silh leh fen chi hrang hrang hi a pe fo thin a. A thinlung zawng zawng hian a ngaihtuah emaw tih mai tur a niin a awmna hmun, Pukpui atang hian a rawn thleng thla fo a, a hla phuah ‘Chhaktiangah Ral a hrang’ tih phei chu a lar hle.
Manipur lamah kan unaute’n harsatna an tawh leh pawhin Pu K. Darchhawna hian mut mawh hnar mawhah a nei leh a, an puala thawhlawm khawn leh a hmuna va hlannaah pawh a meizang hlaptu berah a tang leh thei zel a. ZORO movement hi a tui em em a, helam hi sulhnu a ngahna ber a ni hial awm e. A mize danglam tak chu pawl anga thiltihna reng rengah hian nghah a ngai ngai lo a, a hmun thleng hmasa ber hi a ni ziah thei hi a danglamna a ni. Tlawmngaihna hi a takin a nunpui a, a takin a lantir bawk thin avangin YMA Darchhawna tia an koh fiamna pawh hi thil inhmeh tak a ni thei ang. A thil hriatna a that bawk avangin biakrawn a hlawh hle thin a, tumkhat a nau Darlawma bathlar atanga Saza tlang chanchin min hrilhte kha ngaihnawm tak a ni a, khatiang taka hre chiang kha midang an awm kher a ngem tih tur a ni.
Min boralsan lo sela chuan Pukpui hming phuah chhan pawh fiah takin min la hrilh leh tur a ni a, kum 1986-a Kawmzawl daia Bomb puak avanga ruang an chhar chanchinte leh mitthi lu a ah haw dante kha chiang lo ruaiin kan hre reng dawn ta a nih hi. Chapona nei ngai reng reng lo leh chawimawina tur tam tak nei reng bawk si a nun tam a neih dan zawng zawngte kha sawi tur ava ngah bik tak em, amaha amah kha kum thum chhung vel emaw lek kan inkawm chhung hian ka hre fiah kim hman lo a, ‘My PP Odi’ tih hla lo pian chhuah dan a sawite kha midang sawi ai zawngin a fiah bik a, a dik hmel bik a sin, a chhan chu a thil hriat kha a chiang thei riau tlat si a. A bik takin Mizo Academy of Letters (MAL) Jt. Hqtr member-te phei chu amah vanga kan mittui tla hi eng tikah tak reh ang maw le?