- Dr. C. Lalrampana
A KAMKÊUNA
Tui dahkhawlna tuizem hi aluminium, plastic, rangva, RCC, Steel leh hmanraw chihrang hrang hmangtea siam a awm. Eng hmanraw hmang pawhin siam ni se, khawimaw lai atanga kan tui dahkhawl a put ru emaw a nih chuan a manganthlak thei hle A thawmna hmanraw chiihrang hrang sahbawn, M. Seal etc hmanga hnawh pawhin a phui mawh hle tawh thin. Hei vang hian tuizem la tha tak tak phui tha thei tawh si lo hluihlawn a tam phah thin hle. Tui hnâm, put ru avang hian tui tamtak kan chân thin a, a lo thlawnin a luang ral thin. Tuizem phui tha thei lo avangin tuizem thar khawr a ngaileh fo bawk thin. Chuvangin, tuizem hi put ru lo tura enkawl uluk a ngai hle thin a ni.
NGATINGE A PUH RUK?
Tuizem puhruk chhan hi tam tak a awm thei. Atira khawr fuh loh vang te, sawk palh vang te, a eichhetu a huat zawng tak a tawn vangte leh chhan dang tam tak vangte a ni thei awm e. Kumin HSLC Exam meka MBSE tuizem put ru anga sawi pawh hi MBSE atanga zawhna pûtru ni lovin question setter atanga suggestion pek fuh vang zawk a nih hmel. Ani hi zirtitu nghet niin March 10, 2024 khan hmuhchhuah a ni a, a hna atanga chawlhtir nghal a ni. A hming sawilan ni lo mah se, Govt. Mizo H/S zirtirtu nghet a ni tih hriat a nih avangin CCS Rules 1965 hmanga hrem a ni a, tuman tunge a nih an hai chuang lo. A hming thup aia pawi zawk zawhnaa tel ngei naupang zinga hriat theiha awm kha a nih tur ang ang a nih tawh avangin huaisen taka a hming sawilan mai ãwm tak, a sawt tawh loh hnua lan mawitir tumlehna mai maia hmingthup hi sadukai leh pharisai nun lakchhawnna mai a ni. Kum dangah pawh Zirtirtu ngêt dangin an ei chhiata an reh pawh tawh loh nan a hming leh veng address kimchang takin puan chhuah ni se a tha zawk ngei ang. AIR [11.3 2024[ puan dan phei chuan suggestion petu zirtirtu ai hian a lo ziak kaitu naupang dik lo zawk ang lek lekin a puang lehnghal a. A thawh mekna Govt. Mizo H/S pawh a sikul pumpuiin a hmingchhiat phah vek tawh tho thova, midang tan rinleh harsa khawp a ni tawh tho tho tih hriat a pawimawh hle. Chuvangin, “Sebo hnua sekawngkhar” tih ang maia a titu hming thup thatleh vel hian zawhna pûtru anga ngaih theih kha engtikawng mahin a hnawhphuiin a chul mãm thei tawh lo. Kum dangah pawh MBSE tuizem hi a lo pût ru zeuh zeuh tawh thin a, chuvangin, tihdan tha dang zawna system thlak a pawimawh hle.
ENGTIN MAW?
HSLC /HSSLC Board examination zawhnate hi MBSE hian H/S & HSS hrang hranga zirtirtute atangin zawhna siamtu [question setter] a ruat thin a, ka lo hriat danin sikul lâr deuh leh sikul tha deuh atang phei chuan question setter an tam bik thin niin sawi a awm. Hei hi thil ni thei tak tur a ni. Tuna HSLC Social Science subject-a suggestion inpek fuh pawh hi zawhna a har êma a lan avang khan naupang khan a sawi palh ni maiah ngai ila. Kum dangah pawh lang chhuak si lovin question setter sikul naupangte chuan suggestion fuh tak tak an dawng thin ngei ang tih chu ngaihruat thiam theih a ni. Chuvangin, he Govt. Mizo H/S zirtirtu Question Setter pawh hian question setter dangte tih thin danin a ti ve ni maiah ngaih theih a ni a; amaherawhchu, a lan danin confidentiality a vawnghim tawk lo niin a hriat theih a, a vanduai palh ta hlauh tihna a ni mai. Ani hian “Hei hi a chhuak tur a nia” tiin suggestion hi a pe nge, a hrilh bik chuang lova naupangin an rinthu sawi nge ka hre lo. Chutiang bawkin question setter dangte pawhin suggestion an lo pe fuh a nih pawhin “Hei hi a chhuak tur a nia” an ti bik hauh lovang. Mahse, question setter tan pawh a chhuak lo tur mahni sikul naupangte suggestion pek ai chuan ngawi renga a chhuak ngei tur suggestion pek chu chakawm tak leh tih makmawh tur chu a ni. Chuvangin, tuna MBSE tuizem pûtru anga lang hi MBSE atanga pûtru a nih loh avangin ‘The Guinness World Records official site’-a han dah chiam chi chu a nih loh hmel hle. Zitirtu hian mi tih ang a ti ve ni maiin a lang.
SIAMTHAT DAN TUR
Engtik kum nge ka hre chiah ta lo. New Delhi-ah India rama Public Examination Board hrang hrang meeting an neihnaah MBSE aiawha thusawitu chuan-”MBSE hnuaia exam-ah chuan answer sheet phek hma ber dawt chiahah an centre, no; roll no ilo a lan loh nan lehkha te [chit] kan thil tel zel thin” tiin intirinawm takin a sawi a. Meeting chairman lo ding chhuak chuan-”Mizoram khi Kristian 100% awmna in ni lawm ni? In va rinawm lo ve, chutianga tih a ngai em ni? tiin a rawn react nghal a; a sawitu tan chuan inchhirawm rum rum a ni ngei ang. Hetiang hian tunah tih thin a la ni emaw ka hre lem lo. He thil hian zirtirtute zinga answer endiktu examiner-te rinawm lohzia a lan chiantir hle niin a hriat theih. Zirlaiin a chhannaa a roll no leh centre no a ziah zawnga a phek dawt chiaha a thla lo langleh chu advantage-a hman tumin a endik thin ni ngeiin a lang. Hetiang system tho hi tuna suggestion inpek fuh pawh hi a kalphung chu a nih hmel hle. Hetiang a nih fo dawn ai chuan Sikula thawk lai zirtirtu ni lo; College & University-a thawk mithiam [expert] lawrkhawmin MBSE hian Question Setter tur leh Examiner & Scrutinizer etc.-te ruatin MBSE Academic Cell-ah awmin an awmna tur bik ruahman se, fimkhur tak leh uluk takin MBSE hian enkawl se, suggestion inpek fuh; examiner advantage; zawhna pûtru a awm lovang a, answer sheet-a chit thil tel a ngai tawh hek lovang. Sikula thawk lai mek zirtirtute atanga question Setter, Examiner, Scrutinized etc. ruat hian chin tha lo leh dan lo anga khawsakna [malpractices] a thlen tam hle a ni tih a chiang hle. Chuvangin, Sorkarin Sorkar hna lãka fimkhur nan UPSC & MPSC etc. a din ang hian Board Examination buaipuitu tur Examination Expert Team [EET] siamin MBSE hian uluk takin kalpui se tun ang harsatna neuh neuh kan tawh thin hi a bo duak thei dawn a ni. Hetiang taka hma lak a nih hma chuan zawhna pûtru, suggestion inpek fuh leh malpractice hi a bo hauh lovang a, nakin zelah pawh kan la buai chho fo dawn niin a lang.
A TLÃNGKAWMNA
Mizote hi hnam rinawm, tlawmngaihna ngah, mite tanpui thin, hmeltha, piannalh vak lo, lian lem lo, hnam huaisen, ringtu tamna kan ni. Kum 1952 atanga parliamentary form of government kan neih atang chiah khan vaiho politik tuinu kan la lut a, an zia kan lachhawng a, phakarnain min chim a, ze tha lo tinrengin min chim avangin kan rinawmna a tlahniam a, kan nunphung tha pangngai zawng zawng deuhthaw kan hloh mek a, hei vang hian Board Exam zawhna pûtru leh thil dik lo tam takin min tichhe mek a ni. Chuvangin, kawng tinrengah insiamthat kan ngai nasa tawh hle. Tuna mipui sorkar pawh hian a hmalak mekna hi a titha ta lua ni lovin, dan lo anga kan kal rei tawh lutuk avangin dan ang emaw kan ti tawh zawk hial a; hei vang hian dan rule of law anga a’n kal tanleh ta hi ang tawh lo riaua kan hriat avangin an titha ta lua angin kan ngai mai zawk a ni. MBSE pawh hian a ke pen dan hi thlakin kawng dang tha zawk dap se, tun ai hian an hming chhiat fona hi a pumpelh ang a, zirlai quality pawh tun ai hian a tha zawk ang a, zirna rintlak, ingnghahna tlak kan nei ngeiin a rinawm.