Power & Electricity minister F Rodingliana’n khawlphetha leina bill ba cheng vaibelchhe 144.25 a awm mek thu leh bill ba chu March thlaah rulh zawh vek an tum thu house a hrilh.
Nimin Assembly session-a member te zawhna chhangin P&E minister Rodingliana chuan kawlphetha bill ba an neih mek dan sawiin, Generating Comapany ah vaibelchhe 127 nuai 8 sang 9 leh 493 bat mek a nih thute, transmission company ah cheng vaibelchhe 16 nuai 67 sing 1 sang 6 173 leh North Eastern Regional Load Despatch Centre hnenah cheng nuai 49 sing 8 sang 3 leh 94 an bat mek thu a sawi a, electric bill ba awm mekte chu March thla chhungin rulh vek tum a nih thu a sawi.
Power department chu corporation-ah leh tumna a awm em tih zawhna chhangin P&E minister chuan Corporate lam an hawi tan a, an hmalakna kawng tin reng chu corporate lam hawi zawng a nih zel tawh thu a sawi a, hetihlai hian department chu intodelh phawt tura ruahmanna an neih thu a sawi a. Aizawl khawpui chhunga eletric hrui hlui tawh te chu an thlak mek thu sawi bawkin, central pawisa in KM 20 vel a thui chu hrui tharin kan thlak mek a, theih tawpin hma kan la, a ti.
Rodingliana chuan, hmun hrang hranga transformer te chu kum 20 hma lama lei vek a ni tihte, bial tinah indaihlohna a nasa hle tih a sawi a, hei hi hriain sorkar tharin transformer thar leina tur cheng vaibelchhe 7 a dah a, mamawh zual chu thlak kan tum, a ti a; Minister chuan MLA fund hmang te hian transformer te chu lei ni ta thin se a that a rin thu leh mipui rawngbawlna tho a nih thu a sawi bawk a ni.