Pachhunga University College-a School of Social Sciences chuan ni hnih chhung awh tur international seminar a buatsaih a, khawvel leh India rama social science lama mithiamte an rawn tel.
He seminar hi ‘Voices Unbounded: Perspectives on Social Sciences and Beyond’ tih vuah a ni a, Prof. Duncan McDuie-Ra, University of Newcastle, Australia-a urban sociology zirtirtu chu thusawitu pui ber – keynote speaker a ni. Ani hian March 13, 2024 (Nilaini)-a he seminar hawnna inkhawm PUC Seminar Hall-a neihah ‘North East as Mediated Space’ tih thupui a sawi a, India hmarchhak hi hmun kilkhawr zawk ang a ngaih a ni thin a, chutiang ringawt chu thlir dan tur a nih loh thute a sawi a ni. Prof. Duncan hi India hmarchhak dinhmun zir leh hrechiangtute zinga mi a ni a. A lehkhabu Borderland City in New India: Frontier to Gateway-ah hian Imphal chungchang a sawi nasa a, Dolly Kikon nena an ziah Cease Fire City pawh Dimapur chungchang a ni.
India rama historian lar leh environmentalist Prof. Ramachandra Guha, north east India historian lar leh hriathlawh tak pawhin special lecture pein thu a sawi a. History-ah hian ngaihdan zim leh mahni lampang sawimawi emaw mahni duhdan midang barh luih emaw a rem loh dante leh history chu awn lam bik nei thei a nih loh dante a sawi.
Prof. Ramachandra Guha hi American Historical Association-in historian ngaihsan awmte chawimawina a pek thin Honorary Foreign Member nihna dawngtu a ni a, India mi pathum chauh he chawimawina hi pek an la ni. Lehkhabu hriathlawh tak tak a ziak bakah chanchinbu lian hrang hranga a thuziak thinte chuan chhiar leh ngaihsan a hlawh hle.
Seminar hi vawiinah chhunzawm tur niin India hmarchhak historian lar leh hriathlawh Prof. Sajal Nag leh Mizo historian lar Prof. Joy LK Pachuau te pawhin thupui thlan bik neiin thu an sawi ang.
Prof Sajal Nag hi Pachhunga University College-ah a thawh hnuah Assam University-ah Professor-in a pension a, chumi hnuah Royal Global University, Guwahati-ah Distinguished Professor a ni leh mek a ni. Mizoram leh India hmarchhak history-ah hian a thawhhlawk berte zinga mi niin, hriathlawh tak a ni.
Prof. Joy LK Pachuau hi university lar Jawaharlal Nehru University-ah professor a ni a, a lehkhabu Being Mizo hi Indian History Congress chuan 2015 khan 2012-14 chhunga Modern Indian History-a lehkhabu chhuak tha berah an lo thlang a ni. A thiamna a vang hian chawimawina chi hrang hrang a lo dawng tawh bawk.
“Hetiang mithiam kan chah chhuak thei hi kan lawm a, anmahni mal theuh pawha hming nei leh hriat hlawh tak vek an nih avangin hetianga mithiam punkhawm hi chu a tam vak lo ang, a bikin Mizoram ang hmun kilkhawr zawka ngaihah chuan a harsa thin. Social science zirmite pawhin an hlawkpui ngei kan beisei a ni,” tiin Prof. LH Chhuanawma, head political science department chuan a sawi.
Seminar chhung hian mithiamte thusawi ngaihthlak a nih bakah research paper 38 zet zirho a ni ang. Heng zinga 11 chu online hmanga zirho a ni.