March 12, Thawhlehni zan khan UEFA Champions League last 16, Second leg khelh a ni a. FC Porto laka tlawm tawh Arsenal chuan an mualah si khat faiin hnehna an chang let. Gunners hian penlaty shoot-out ah 4-2 in hnehna an chang a, kum 14 zet hnuah UCL quarter-final an lut.
Premier League-a khel tha tak, an khelh hnuhnunga goal thun teuh teuh thin Arsenal hian Last 16-ah FC Porto an hmachhawn a, Portugal club lian lakah chak ngei tura ngaih ni mah se an vanduai a, an lenluhna mual Estádio do Dragão-ah si khat faiin an vanduai. Mimualah an tlawm vangin last 16 an paltlang zo leh nge nge tura ngaih a ni hman a, an boruak a hniam hman.
An mualah chak mamawh tak chunga inlan Aesenal hian an mikhualte an nawr nasa hle a, chawlhlawk hmain an hlawhtling. Arsenal tan a khelh chhuna goal thun thei tak Leandro Trossard chuan minute 41-naah captain Ødegaard siamsak atangin goal pawimawh tak a thun. Trossard goal thun hian an si phurh an sut zo a, chak turin goal thun belh an mamawh. FC Porto pawhin chak tumin tan an khawh nasa viau bawk a, inkhel a hmuhnawm zui hle. Hun pangngaiah goal thun belh thei an awm lova, extratime minute 30 chhungin goal thun belh thei an awm lo bawk a, penalty shootout hmangin thelh an ngai.
Penalty-ah hian Arsenal tana pettu Martin Odegaard, Kai Havertz, Bukayo Saka leh Declan Rice ten an pet goal vek laiin Porto tan pettu pahnih; Wendell leh Galeno ten an thelh vangin Arsenal chuan 4-2 in hnehna an chang a, quarter-final an lut ta nge nge a ni.