March 14, Ningani zan khan Europa League last 16 khelh zawh a ni. Last 16 second leg-ah hian Liverpool chuan an mikhual Sparta Prague chu lakah awlsam takin hnehna an chang a, quarter-final an lut. Liverpool rual hian West Ham United pawhin quarter-final an lut a. Brighton erawh chu AS Roma paltlang zo lovin an tla ve thung.
- Liverpool an chak nuamsa
Mimualah 5-1 ngawta hnehna lo chang tawh Liverpool chu Anfield-ah tha zawkin an inlan a. Czech Republic club lian Sparta Prague chu 6-1 ngawtin an sawp zui leh a, si belhkhawmah 11-2 ngawtin hnehna an chang.
Reds hian Anfield-ah bul an tan tha viau a, inkhel tan atanga minute sarihna lekah Darwin Nunez chuan midfielder Szoboszlai siamsak atangin hmahruaina goal a thun nghal. Hma takah goal an thun vangin an phur viau a, goal pawh an thun belh leh thuai. Hmahruaina goal an thun lawmna au rawl a reh kim hmain Bobby Clark chuan Mohamed Salah siamsak atangin an goal hnihna a thun zui leh zat.
Inhnaihchilh taka goal an chhuah zawn vangin Sparta Prague an buai a, goal an chhuah belh leh thuai bawk. An goal hnihna siamchhuaktu Salah chuan minute 10-naah Clark siamsak atangin an goal thumna a thun. Clark goal thun kha Salah siam a ni a, Salah goal thun pawh hi Clark siamsak ni ve bawkin, an inlawm tawn tha hle. Minute thum chhung lekin goal thum chhuah mah se Sparta Prague an insiamtha thei lova, an tan kawl a eng tak tak thei lo. Salah goal thun atanga minute lo hnu lekah Cody Gakpo chuan Salah siamsak atangin an goal lina a thun zui leh zat.
An mualah tha chungchuang taka khelin, minute 14 chhung lekin goal li thun hman mah se Liverpool hian chawlhlawk hmain goal dang an thun belh thei tawh lo teh tlat. Liverpool goal thun tluang lai a tawp lailawk lai hian Sparta Prague tan Veljko Birmancevic chuan minute 42-naah goal thunin an si phurh a sut then a. 4-1 a hmahruai chungin Liverpool in chawlhlawk an hmang.
Chawlhlawk hnu lamah Liverpool an khel tha chhunzawm viau a, goal pawh an thun leh thuai. Second half tan atanga minute thumna lekah Dominik Szoboszlai chuan Salah siamsak atangin an goal ngana a thun a. Szoboszlai goal thun hnu lawk hian Gakpo chuan an goal thumna a thun belh zui leh a, darkar khat em pawh an khelh tlin hmain goal ruk ngawt an thun hman. Goal thun zawn zawt zawt mah se minute 55 hnu lamah goal an thun belh thei tawh lo va, an mikhual lakah zahngaihna an lantir a ni ber tawh. Hun tawp thlengin goal dang luh belh thei tawh lo mah se Liverpool hian si belhkhawmah 11-2 ngawtin an khingpuite an sawp a, quarter-final an lut chiang hle.
Liverpool hi inelna hrang hrangah an khel tha tluang viau a, Carabao Cup-ah an champion hnuin inelna lian dang pathumah champion thei dinhmunah an ding mek. An manager Jurgen Klopp chuan season tawp rualin an kalsan dawn a. An manager ropui Klopp thlah nan trophy pali lak tumin tan an khawh mek.
- West Ham an chak chiang
Ningani zana inkhel dangah EPL club dang West Ham United pawhin an mualah chiang takin hnehna an chang a, an mikhual SC Freiburg chu 5-0 ngawtin an sawp.
West Ham hi SC Freiburg lakah si khat faiin an lo tlawm tawh a, quarter-final lut turin London Stadium-ah chak ngei ngei an mamawh. Chak an mamawh ang ngeiin an mualah an chak chiang hle. Chak mamawh Hammers tan hian Lucas Paquetá chuan minute 9-na lekah hmahruaina goal a thun a. Mimuala an si phurh an sut vangin an phur viau a, chawlhlawk dawn hnaih minute 32-naah Jarrod Bowen chuan an goal hnihna a thun zui leh a, si belhkhawmah 2-1 a hmahruai chungin chawlhlawk an hmang.
Chawlhlawk hnu lamah West Ham an khel tha zui viau a, goal thum dang an thun belh leh. Aaron Cresswell chuan minute 52-naah hmahruaina goal a thun a. An hmahruaina an tihzau hnuin Mohammed Kudus chuan goal hnih dang a thun belh zui leh a, an mualah si nga fai ngawta hnehna changin quarter-final an lut zui ta a ni.
- Brighton an tla
EPL club Liverpool leh West Ham United ten quarter-final an luh laiin EPL club dang Brighton & Hove Albion chu AS Roma paltlang zo lovin an tla ve thung.
Brighton hian Roma hi first leg ah si thum faiin an lo hneh lo tawh a, quarter-final lut turin an dinhmun a chhe viau tawh. An mualah si thum fai tala chak mamawh chungin inlan mah se goal khat bak an thun thei lova, si belhkhawmah 4-1 a chak lovin an tla zui ta a ni.
- Result dang
Last 16 a inkhel dangah AC Milan chuan an khingpui Slavia Prague chu si belhkhawmah 7-3 ngawtin an sawp a, phu takin quarter-final an lut. Rangers mualah si khat faia hnehna changin Benfica pawhin si belhkhawmah 3-2 in hnehna an chang a, quarter-final an lut ve bawk.
German Bundesliga hmahruaitu Bayer Leverkusen chuan an mikhual FK Qarabag lakah si hnih an phurh hmasak hnuin 3-2 in hnehna an chang let thei hram a. Si belhkhawmah 5-4 a hnehna changin quarter-final an lut. Atalanta leh Marseille te pawhin quarter-final an lut ve bawk.